రాష్ట్ర ప్రభుత్వం ప్రతిష్ఠాత్మకంగా తీసుకుని 30 లక్షల మందికి ఇళ్ల స్థలాలను పంపిణీ చేసిన వైఎస్ఆర్ జగనన్న కాలనీల పథకంతో వైసీపీ అధినేత పెద్ద స్కెచ్ వేశారా? ఏపీలో కొత్తగా 17500 కాలనీలు ఏర్పాటు చేసి, భవిష్యత్తులో వాటిని వైసీపీ ఓటు బ్యాంకులుగా తీర్చి దిద్దుతారా? అనే అనుమానాలు వస్తున్నాయి. అర్హత ఉన్న ప్రతివారికి ఇళ్ల పట్టా ఇచ్చామని ప్రభుత్వం చెబుతున్నా, అర్హత ఉన్న ప్రతి వైసీపీ కార్యకర్తకు ఇచ్చారంటే కరెక్టుగా ఉంటుంది. ఎందుకంటే గ్రామస్థాయి నుంచి జిల్లా స్థాయి వరకు వైసీపీ నేతల చెప్పిన పేర్లే రెవెన్యూ అధికారులు లబ్ధిదారుల జాబితాలో చేర్చారు. కనీసం 80 శాతం వైసీపీ కార్యకర్తలు ఉండేలా జాగ్రత్త పడ్డారనే విమర్శలు వస్తున్నాయి. ఇక మిగిలిన 20 శాతం లబ్ధిదారులు కూడా తటస్థంగా ఉండే వారికే ఇళ్ల పట్టాలు ఇచ్చారని ప్రతిపక్షాలు విమర్శలు చేస్తున్నాయి.
కాలనీలు కాదు గ్రామాలనే నిర్మిస్తున్నాం
ఈ లేఅవుట్ చూస్తుంటే ఇక్కడ ఒక పెద్ద నగరమే వచ్చేలా ఉందని సీఎం జగన్మోహన్ రెడ్డి ఇళ్ల స్థలాల పంపిణీలో వ్యాఖ్యానించారు. కొన్ని ప్రాంతాల్లో వేసిన లేఅవుట్లలో మొత్తం ఇళ్లు నిర్మిస్తే అక్కడ లక్షమందికిపైగా జనాభా వచ్చే అవకాశం ఉంది. అలాంటి ప్రాంతాల్లో పాఠశాలలు, అంగన్ వాడీలు అన్నీ సౌకర్యాలు కల్పించాల్సి ఉంటుంది. వచ్చే ఎన్నికల నాటికి ఆ కాలనీల్లో పోలింగ్ బూత్ లు కూడా ఏర్పాటు చేస్తారు. దీని ద్వారా ఆయా కాలనీల్లోకి ప్రతిపక్షాల నేతలను అడుగుపెట్టనీయకుండా చూడాలనే ఉద్దేశంతో వైసీపీ అధినేత భారీ స్కెచ్ వేసినట్టు రాజకీయ విశ్లేషకులు అనుమానిస్తున్నారు.
Must Read ;- తెల్లకార్డుతో పనిలేదు : మైలవరంలో అమ్మకానికి ఇళ్ల పట్టాలు
టీడీపీ పట్టున్న నియోజకవర్గాల్లో పెద్ద వెంచర్లు
తరచూ టీడీపీ గెలుస్తున్న నియోజకవర్గాలపై వైసీపీ అధినేత కన్ను వేశారని తెలుస్తోంది. టీడీపీ గెలిచే నియోజకవర్గాల్లో 100 నుంచి 400 ఎకరాల్లో భారీ వెంచర్లు వేసి, పక్క నియోజకవర్గం ప్రజలకు ఆ వెంచర్లలో ఇళ్ల పట్టాలు పంపిణీ చేశారు. ఉదాహరణకు గన్నవరం నియోజకవర్గంలో టీడీపీకి మంచి పట్టుంది. 2019 వైసీపీ హవా కొనసాగినా గన్నవరం నియోజకవర్గంలో మాత్రం టీడీపీ జెండా రెపరెపలాడింది. గన్నవరం నియోజకవర్గం నున్న గ్రామంలో 140 ఎకరాల్లో భారీ వెంచర్ వేసి విజయవాడ నగర లబ్ధిదారులను అక్కడకు తరలించే ప్లాన్ వేశారు. వచ్చే ఎన్నికల నాటికి ఈ భారీ వెంచర్ లో 5 వేల ఇళ్లు రానున్నాయి. అంటే దాదాపు 15వేల మంది ఓటర్లు ఇక్కడ నివసించే అవకాశం ఉంది. వీరంతా గన్నవరం నియోజకవర్గానికి సంబంధం లేని వారే. ఓటర్ల జాబితా సవరణలో వీరంతా ఇక్కడ ఓట్లు నమోదు చేసుకునే అవకాశం ఉంది. జగనన్న కాలనీల్లోకి ప్రతిపక్షాలను అడుగుపెట్టనీయకుండా టీడీపీ పట్టున్న నియోజకవర్గాల్లో వైసీపీ అభ్యర్థులు గెలిచేలా ఇప్పటి నుంచే పక్కా వ్యూహంతో ముందుకు వెళుతున్నట్టు తెలుస్తోంది. ఇలాంటివే మరికొన్ని ఉదాహరణలు చూద్దాం.
గుంటూరు పశ్చిమ నియోజకవర్గం టీడీపీ కంచుకోటగా భావిస్తారు. 2019 ఎన్నికల్లోనూ గుంటూరు పశ్చిమలో టీడీపీ ఎమ్మెల్యే మద్దాల గిరిధర్ గెలిచారు. తాజాగా గుంటూరు పశ్చిమకు ఆనుకుని ఉన్న పేరేచర్లలో 400 ఎకరాల్లో జగనన్న కాలనీ ఏర్పాటు చేశారు. ఇక్కడ దాదాపు లక్షమంది జనాభా వచ్చే అవకాశం ఉంది. ఈ కాలనీ ఓటర్లు రెండు నియోజకవర్గాల్లోకి వచ్చే విధంగా ప్లాన్ చేసినట్టు తెలుస్తోంది. ఇటు తాడికొండ నియోజకవర్గం, గుంటూరు పశ్చిమ నియోజకవర్గాల్లోకి ఈ భారీ లేఅవుట్ ఉండేలా జాగ్రత్త పడ్డారు. దీంతో రాబోయే ఎన్నికల్లో రెండు నియోజకవర్గాల అభ్యర్థుల గెలుపోటముల నిర్ణయంలో ఈ లేఅవుట్ ప్రజల ఓట్లు కీలకంగా మారనున్నాయి.
అడుగుపెట్టే హక్కులేదంటారా?
ఇంటి స్థలం మేమే ఇచ్చాం. ఇళ్లు కూడా ఉచితంగా నిర్మించి ఇచ్చాం. ఈ కాలనీల్లోకి టీడీపీ వారికి అడుగుపెట్టే హక్కు కూడా లేదని వచ్చే ఎన్నికల్లో ప్రచారం చేసినా ఆశ్చర్య పడాల్సిన పనిలేదని అంటారేమోననే అనుమానం కలుగుతోందని రాజకీయ పండితులు అనుమానాలు వ్యక్తం చేస్తున్నారు. ప్రజాస్వామ్యంలో ఎన్నికల్లో పోటీ చేసిన ప్రతివారూ ఓట్లు అభ్యర్థించే హక్కు ఉంది. వచ్చే ఎన్నికల్లో వైఎస్ఆర్ జగనన్న కాలనీల్లోకి టీడీపీ నేతలకు ప్రవేశం లేకుండా చేసి, రాజ్యాంగం కల్పించిన హక్కును కూడా కాలరాసే ప్రమాదం లేకపోలేదనే అనుమానాలు వ్యక్తం అవుతున్నాయి.
అన్న స్కెచ్ అదిరింది
ఓట్ల కోసమే భారీ కాలనీలు ఏర్పాటు చేయడం దేశచరిత్రలో ఇంత వరకు లేదు. ఎందుకంటే సెంటు భూమి ఇచ్చి అందులో చక్కని ఇళ్లు నిర్మిస్తామని చెప్పడం నిజంగా బూటకమే. ప్రభుత్వం కాలనీలు కాదు, మురికివాడలు తయారు చేస్తోందని వామపక్షాలు విమర్శిస్తున్నాయి. ప్రభుత్వానికి చిత్తశుద్ధి ఉంటే పేదలకు 3 సెంట్లు ఇంటి స్థలం ఇవ్వాలని వారు డిమాండ్ చేస్తున్నారు. జగనన్న కాలనీలు జనంతో నిండిపోతే కోటి మంది ఓటర్లకు స్థాన చలనం కలిగే అవకాశం ఉంది. ఇది ఏపీ రాజకీయ నాయకుల అంచనాలను తారుమారు చేసే అవకాశం కనిపిస్తోంది. దీనిపై కొందరు కోర్టులను కూడా ఆశ్రయించారు. అయితే తీర్పులు వెలువడాల్సి ఉంది. వేచి చూద్దాం. ఎన్ని వింతలు జరగనున్నాయో.
Also Read ;- ఇళ్ల పట్టాలు మాకొద్దు.. విషయం తెలిసి అవాక్కయిన వైసీపీ ఎమ్మెల్యే
