లవ్ .. యాక్షన్ .. ఎమోషన్ కి ప్రాధాన్యతనిస్తూ కథలను రెడీ చేసుకోవడంలో గౌతమ్ మీనన్ సిద్ధహస్తుడు. కథను బట్టే ఆర్టిస్టులను ఎంపికచేసే కొద్దిమంది దర్శకులలో ఆయన ఒకరు. ఆయన టేకింగ్ చాలా డిఫరెంట్ గా ఉంటుంది. తెలుగు .. తమిళ భాషల్లో ఆయన సినిమాలకి మంచి డిమాండ్ ఉంది. ఆయన సినిమాలు పరాజయం పాలైనా టేకింగ్ పరంగా మంచి మార్కులు కొట్టేస్తూ ఉంటాయి. ఒక వైపున సినిమాలు .. మరో వైపున వెబ్ సిరీస్ లతో ఆయన బిజీగా ఉన్నారు. అంతేకాదు నటుడిగా కూడా ఆయన బిజీ అవుతుండటం మరో విశేషం.
గౌతమ్ మీనన్ గతంలో కొన్ని సినిమాల్లో సరదాగా కొన్ని ముఖ్యమైన పాత్రలను పోషించారు. ఈ మధ్య దుల్కర్ సల్మాన్ – రీతూ వర్మ కాంబినేషన్లో వచ్చిన ‘కనులు కనులను దోచాయంటే’ సినిమాలో గౌతమ్ మీనన్ పోలీస్ ఆఫీసర్ పాత్రను పోషించారు. ఆ పాత్ర ఆయనకి మంచి పేరు తెచ్చిపెట్టింది. ఆయనలో ఒక మంచి నటుడు ఉన్నాడనే విషయాన్ని ఈ సినిమా మరోసారి నిరూపించింది. దాంతో గౌతమ్ మీనన్ కి నటుడిగా కూడా అవకాశాలు బాగానే వస్తున్నాయట. వాటిలో తనకి నచ్చిన పాత్రలను ఆయన అంగీకరిస్తున్నాడని అంటున్నారు.
ఈ సారి గౌతమ్ మీనన్ ఏకంగా ఓ పవర్ఫుల్ విలన్ పాత్రను పోషించడానికి రెడీ అవుతున్నారు. గతంలో గౌతమ్ మీనన్ దగ్గర కృష్ణ అనే కుర్రాడు డైరెక్షన్ డిపార్టుమెంటులో పనిచేశాడట. అతను శింబు హీరోగా ఒక సినిమాను రూపొందిస్తున్నాడు. ‘పతుతల’ అనే టైటిల్ తో నిర్మితమవుతున్న ఈ సినిమాలో విలన్ పాత్రను చేయమని కోరడంతో, గౌతమ్ మీనన్ గ్రీన్ సిగ్నల్ ఇచ్చాడని అంటున్నారు. జ్ఞానవేల్ రాజా నిర్మిస్తున్న ఈ సినిమాకి, ఏఆర్ రెహ్మాన్ సంగీతాన్ని అందిస్తూ ఉండటం విశేషం. గతంలో శింబు హీరోగా సినిమా చేసిన గౌతమ్ మీనన్, ఇప్పుడు ఆయనకి విలన్ గా చేస్తుండటం మరో విశేషం.
Must Read ;- ‘మేము హీరోలం కాదు.. కానీ మీ ప్రాణాల కోసం శ్రమిస్తున్నాం’
