మూవీ ఆర్టిస్ట్ అసోసియేషన్ (మా)కు ఎన్నికలు జరగబోతున్నాయి అంటే అసెంబ్లీ ఎన్నికలంత హడావుడి మాత్రం కనిపిస్తుంటుంది. వాస్తవానికి ఇది సినిమా రంగంలో నటీనటులకు సంబంధింంచిన అసోసియేషన్ మాత్రమే. ఈ అసోసియేషన్ లోని అంతర్గత రాజకీయాలు చూస్తుంటే వామ్మో ఇవేం ఎన్నికలు అనిపించేలా పరిస్థితి తయారవుతోంది. గత ఎన్నికల్లో ఓటమిని చవిచూసిన శివాజీ రాజా పదవి నుంచి వైదొలగడానికి కూడా ససేమిరా అన్నారు. బాషా సినిమాలో ఓ డైలాగ్ ఉంటుంది ‘బాషా అంటే పాదుషా అనుకున్నావురా’అంటూ విజయ కుమార్ హీరో రజనీకాంత్ తో అంటాడు. మా అధ్యక్ష పదవి కూడా అలాంటి పాదుషా పదవే అనుకోవాలేమో.
ఇది ఓ పెద్ద పదవిలానే సినిమా రంగంలో భావిస్తున్నారు. సినీ పెద్దల హస్తం ఎవరిపైన ఉంటే వారిదే ఇక్కడ పైచేయిలా ఉంటుంది. ముఖ్యంగా మెగా స్టార్ చిరంజీవి ఎటువైపు ఉంటారు అనేది ప్రతిసారీ చర్చనీయాంశం అవుతుంటుంది. త్వరలోనే మా అసోసియేషన్ ఎన్నికలు జరుగబోతున్నాయి. మా అధ్యక్ష పదవికి ఈసారి నటుడు ప్రకాష్ రాజ్ పోటీపడబోతున్నట్టు స్పష్టమైంది. ఆయనపై పోటీగా మోహన్ బాబు తనయుడు మంచు విష్ణు పేరు తెరపైకి వచ్చింది. ప్రకాష్ రాజ్ కు నాగబాబు మద్దతు పలకబోతున్నట్లు వార్తలు కూడా వచ్చాయి. అంటే చిరంజీవి ప్రకాష్ రాజ్ వైపే ఉన్నట్లు సంకేతాలు వెళుతున్నాయి.
అలా జరిగితే మోహన్ బాబు నొచ్చుకోవడం ఖాయం. ప్రకాష్ రాజ్ కు పోటీగా మంచు విష్ణు పోటీలోకి దగుతుండటంతో ఎన్నికలు రసవత్తరంగా మారతాయని స్పష్టమవుతోంది.తాను బరిలోకి దిగబోతున్నట్లు స్వయంగా ప్రకాష్ రాజ్ ప్రకటించారు. అంతేకాకుండా ఒక అడుగు ముందుకు వేసి న్యూస్ ఛానల్ కి ఇంటర్ వ్యూలు ఇస్తూ.. ప్రచారం ఆరంభించడం కూడా జరిగింది. ఈసారి తనని గెలిపిస్తే.. మా కు సొంత భవనం నిర్మిస్తానని.. ఇది ఒక సంవత్సరం లోపే చేస్తానని ప్రకటించారు.
ఇదిలా ఉంటే.. ప్రకాష్ రాజ్ కి పోటీగా మంచు విష్ణు రంగంలోకి దిగనున్నారని వార్తలు వచ్చాయి. నాగబాబు ఆల్రెడీ ప్రకాష్ రాజ్ కి మద్దతు ఇస్తానని మీడియా సాక్షిగా ప్రకటించారు. దీంతో మిగిలిన వారు ప్రకాష్ రాజ్ కి సపోర్ట్ చేస్తారా..? విష్ణుకి సపోర్ట్ చేస్తారా..? అనేది ఆసక్తిగా మారింది. అయితే.. ఈ రోజు మంచు విష్ణు, తండ్రి మోహన్ బాబుతో కలిసి సూపర్ స్టార్ కృష్ణను కలిసారు. మా ఎన్నికల్లో సపోర్ట్ కోసం కృష్ణని కలిశారని వార్తలు వచ్చాయి. అంతే కాకుండా కృష్ణను కలిసినప్పటి ఫోటో కూడా బయటకు వచ్చింది.
దీంతో విష్ణు సీరియస్ గానే మా ఎన్నికల్లోకి దిగనున్నారని టాలీవుడ్ లో టాక్ వినిపిస్తోంది. నాగబాబు ఆల్రెడీ ప్రకాష్ రాజ్ కి మద్దతు తెలియచేశాడు కాబట్టి చిరంజీవి ప్రకాష్ రాజ్ కి మద్దతు తెలియచేస్తారా..? లేక ఇటీవల కాలంలో మోహన్ బాబు, చిరంజీవి చాలా సన్నిహితంగా ఉంటున్నారు కాబట్టి విష్ణుకు చిరంజీవి తన మద్దతు తెలియచేస్తారా..? అనేది ఆసక్తిగా మారింది. మంచు విష్ణుకు సిట్టింగ్ ప్రెసిడెంట్ నరేష్ మద్దతు లభించే అవకాశం కనిపిస్తోంది. ఏది ఏమైనా మూవీ ఆర్టిస్ట్ అసోసియేషన్ ఎన్నికలు మరొకసారి రసవత్తరంగా మారనున్నాయి అనిపిస్తుంది. మరి.. రానున్న రోజుల్లో ఏం జరగనుందో చూడాలి.
Must Read ;- ‘మా’ బరిలో ప్రకాష్ రాజ్.. పోటీ ఎవరో తెలుసా?
