మూవీ ఆర్టిస్ట్స్ అసోసియేషన్ (మా) అధ్యక్ష పదవికి జరిగే ఎన్నికల్లో పోటీకి నలుగురి పేర్లు వినిపిస్తున్నా చివరికి ప్రధాన పోటీ ఇద్దరి మధ్యే జరిగే అవకాశమే కనిపిస్తోంది. అందులో ఒకరు మంచు విష్ణు, ఇంకొకరు ప్రకాష్ రాజ్. విష్ణు గెలుపును మోహన్ బాబు ప్రతిష్ఠాత్మకంగా తీసుకున్నారు.
ఓ పక్క ‘మెగా’ వ్యూహం ఉండగా, మరో పక్క మోహన్ బాబు ఇంకోలా చక్రం తిప్పబోతున్నారు. ఈ విషయంలో ఆయన వెనక ఆయన జిగిరీ దోస్త్ ‘రౌడీ’లా భయపెట్టే వ్యక్తి కీలకపాత్ర పోషిస్తున్నట్టు సమాచారం. మోహన్ బాబు ఏ పనిచేసినా వెనక ఈయనగారి హస్తం ఉండనే ఉంటుంది. రామానాయుడు స్టూడియో ముందు పరిటాల రవిని చంపడానికి బాంబు దాడి జరిగినప్పుడు పరిటాల రవి కారులో మోహన్ బాబుతో పాటు ఈయనగారు కూడా ఉన్నారు. ఇంత చెప్పినప్పుడు ఆయన పేరు చెప్పకపోతే బాగుండదు.
‘మండే’ చిన్న శ్రీశైలంతో ‘మంచు’ స్నేహం.?
మోహన్ బాబుకూ, చిన్న శ్రీశైలం యాదవ్ మధ్య దాదాపు మూడు దశాబ్దాల బంధం ఉంది. చిన్న శ్రీశైలం యాదవ్ గురించి హైదరాబాద్ లో తెలియని వారుండరు. మోహన్ బాబుతో చిన్న శ్రీశైలం యాదవ్ కు ఉన్నది ‘దోస్త్ మేరా దోస్త్’ బంధమే. తన కుమారుడు విష్ణును మా అధ్యక్ష పదవికి పోటీ చేయాలనుకున్నప్పుడు ముందుగా ప్రస్తుత మా అధ్యక్షుడు వీకే నరేష్ తోనూ మోహన్ బాబు మాట్లాడారు. ఈసారి కూడా ఈ పదవికి పోటీ చేసే ఆలోచన ఉన్నా మోహన్ బాబు అడగడంతో వీకే నరేష్ కూడా మిడల్ డ్రాప్ అయ్యారు. విష్ణును పోటీ చేయించాలన్న ఆలోచన వచ్చిన వెంటనే చిన్నశ్రీశైలం యాదవ్, నరేష్ లతో కలిసి వెళ్లి నట శేఖర్ కృష్ణగారిని కూడా మోహన్ బాబు కలిశారు.
ఇలా మోహన్ బాబు చాపకింద నీరులా తన వ్యూహాన్ని పారిస్తున్నారు. చిన్న శ్రీశైలం యాదవ్ కు కూడా సినిమా రంగంతో 30 ఏళ్లుగా పెనవేసుకున్న బంధమే ఉంది. సినిమా ఫైటర్స్ అసోసియేషన్ కూ, జూనియర్ ఆర్టిస్ట్స్ అసోసియేషన్ కూ గౌరవ అధ్యక్షుడిగా కూడా చిన్న శ్రీశైలం యాదవ్ పనిచేశారు. సినిమా రంగంలో ఉండే 24 క్రాప్ట్స్ వారందరితోనూ ఆయనకు సత్సంబంధాలు ఉన్నాయి. పైగా తెలంగాణ సినిమాటోగ్రఫీ మంత్రి తలసాని శ్రీనివాస యాదవ్ కు చిన్న శ్రీశైలం వియ్యంకుడు కూడా. అందుకే మోహన్ బాబుకు సంబంధించిన కుటుంబ వ్యవహారాన్ని చిన్న శ్రీశైలం భుజాన వేసుకున్నట్లు తెలుస్తోంది.
మెగా స్టార్ ‘మా’ట ఇచ్చారు..
విలక్షణ నటుడు ప్రకాష్ రాజ్ విషయానికి వస్తే ఈ పదవికి పోటీ చేయాలన్న ఆలోచన మొట్టమొదటిసారి ప్రకాష్ రాజ్ కు వచ్చిందట. వెంటనే మెగాస్టార్ చిరంజీవిని కలవగానే గెలిపిస్తానని ఆయన మాట ఇచ్చారన్న ప్రచారం జరుగుతోంది. ప్రకాష్ రాజ్ స్థానికేతరుడైనా హైదరాబాద్ సమీపంలోనే ఉండే ఫామ్ హౌస్ లో నివాసం ఉంటున్నారు. తెలంగాణ ప్రాంతంలోని రెండు గ్రామాలను దత్తత తీసుకుని సేవలందిస్తున్నారు. ప్రకాష్ రాజ్ కు నిజంగా చిరంజీవి మాట ఇచ్చారా? లేదా అది ప్రచారం మాత్రమేనా అన్నది కూడా తేలాల్సి ఉంది.
సెప్టెంబరులోపు ఎన్ని మార్పులైనా జరగవచ్చు. తనకు చిరకాల మిత్రుడు మోహన్ బాబు రంగంలోకి వస్తాడని ఆయన తెలియకపోవచ్చు కూడా. పైగా మోహన్ బాబుతో కలిసి ఆయన ఎన్నో సినిమాల్లో నటించారు. ఇద్దరూ హీరోలుగానే చేశారు. బరిలో మూడో పోటీదారుగా ఉన్న జీవితను కూడా తక్కువ అంచనా వేయడానికి వీల్లేదు. అయితే ఆమెకు ఏదో ఒక విధంగా నచ్చచెప్పి తప్పించే ప్రయత్నాలు జరగవచ్చు. హేమ విషయంలోనూ అంతే. వేరొక పదవిని ఆశ చూపి ఆమెను కూడా తప్పించడానికే అవకాశం ఉంది. చివరికి ప్రధాన పోటీ మాత్రం విష్ణు, ప్రకాష్ రాజ్ ల మధ్యే జరిగే అవకాశాలు మెండుగా ఉన్నాయి.
-హేమసుందర్
Must Read ;- ప్రకాష్ రాజ్, విష్ణు, జీవిత, హే..‘మా’ అండ్ కో?
