ఓటీటీలో తరచుగా సినిమాలు వీక్షించే వారు చూడదగ్గ హార్ట్ టచింగ్ మలయాళ మూవీ ‘వికృతి. కళ్ళెదురుగా కనిపించేదంతా నిజం కాకపోవచ్చు. మనం నిజమని భ్రమపడే ప్రతీ దృశ్యం వెనుకా ఒక చేదు నిజం ఉండొచ్చు. ఇలాంటి ఓ యదార్ధ సంఘటన కేరళలోని కొచ్చీ మెట్రో ట్రైన్ లో జరిగింది. దాని ఆధారంగానే ‘వికృతి’ సినిమా తెరకెక్కింది. ఎమ్సీ జోసెఫ్ అనే డెబ్యూ డైరెక్టర్ ఈ సినిమాను చాలా హృద్యంగా తెరకెక్కించాడు.
కథేంటి?: ఎల్దో , అతడి భార్య ఎల్సీ ఇద్దరూ కూడా మూగ, చెముడు బాధితులు. ఇద్దరు పిల్లల్ని ఏ లోటూ లేకుండా చూసుకుంటారు. ఉన్న కాస్త సంపాదనలోనే కుటుంబాన్ని పోషించుకుంటూ జీవిస్తూ ఉంటారు. ఒక రోజు ఎల్దో కూతురికి సుస్తీ చేస్తుంది. ఆమెను హాస్పిటల్ లో జాయిన్ చేస్తారు. ఎల్దో నిద్రలేకుండగా కంటిన్యూస్ గా రెండు రోజులు కూతురి దగ్గరే ఉండాల్సి వస్తుంది. అదే పొజిషన్ లో అతడు ఆ మర్నాడు ఇంటికి వెళ్ళడానికి మెట్రో ట్రైన్ ఎక్కుతాడు. సీట్లో ఒళ్ళు తెలియకుండా నిద్రపోతాడు. అది చూసిన సమీర్ అనే యువకుడు తన సెల్ తో ఫోటో తీసి.. కొచ్చీ మెట్రో తాగుబోతు అని ట్యాగ్ ఇచ్చి సోషల్ మీడియాలో పోస్ట్ చేస్తాడు.
ఫేస్ బుక్ లోనూ, ట్విట్టర్ లోనూ అది బాగా వైరల్ అవుతుంది. దాని కారణంగా ఎల్దోని ఉద్యోగం లోంచి తీసేస్తారు. అతడి పిల్లలు కూడా అతడిని దోషిగా చూస్తారు. మూగవాడైన అతడు .. తాను తాగలేదని చెప్పుకోలేని పరిస్థితి. కొద్దిరోజులకు సమీర్ కు ఎల్దో తాగుబోతు కాదని, మూగవాడనే నిజం తెలుస్తుంది. దాంతో చాలా గిల్టీ గా ఫీలవుతాడు. ఇంతలో అతడి పెళ్ళి కుదురుతుంది. ఆ పరిస్థితుల్లో ఎల్దో స్నేహితులు సమీర్ మీద పోలీస్ కేసు పెడతారు. చివరికి సమీర్ ఏం చేశాడు? ఆ పోలీస్ కేసు నుంచి ఎలా బైటపడ్డాడు అన్నదే మిగతాకథ.
ఎలా తీశారు?: ఎక్కడ పడితే అక్కడ.. ఏది కనబడితే దాన్ని సెల్ఫీలో బంధించి, ఫోటోలు తీసుకొని సోషల్ మీడియాలో పోస్ట్ చేసే కొందమంది పిచ్చోళ్ళకి ఈ సినిమా చెంపపెట్టుగా మారుతుంది. కళ్ళతో చూసేదానికీ, వాస్తవానికి తేడా గుర్తించమని గడ్డిపెడుతుంది. సెన్సిటివ్ విషయాల్ని సెన్స్ లెస్ గా తీసుకోవద్దని వార్నింగిస్తుంది. చాలా హృద్యమైన సంఘటనను చాలా కేర్ఫుల్ గా .. మంచి స్కీన్ ప్లేతో , చక్కటి సందేశంతో తెరకెక్కించిన దర్శకుడ్ని అభినందించాల్సిందే. ఎల్దోగా సురాజ్ వెంజారమూడ్, ఎల్సీగా సురభి లక్ష్మి అద్భుతమైన పెర్ఫార్మెన్స్ ఇచ్చారు. ఇందులో విశేషమేంటంటే.. ఈ ఇద్దరూ నేషనల్ అవార్డు గ్రహీతలే. అలాగే… సమీర్ గా సౌబిన్ షాహిర్ చాలా సహజంగా నటించాడు.
హైలైట్స్ : మూగవారి బాధలు, వారి భావోద్వేగాలు. వారి మంచి మనసు ఈ సినిమాలో చెప్పుకోదగ్గ రీతిలో ఆవిష్కృతమయ్యాయి. ఆలోచింపచేసే కథాకథనాలు, వండర్ ఫుల్ సినిమాటోగ్రఫీ ఈ సినిమాకి మరింత బలం చేకూర్చాయి. మరో హైలైట్ ఏంటంటే.. ప్రధాన పాత్రల్లో నటించిన సురాజ్ వెంజారమూడ్, సౌబిన్ షాహిర్ ఇద్దరూ కూడా మాలీవుడ్ లో స్టార్ కమెడియన్స్. ఒకరికొకరు పోటీ పడి నటించారు.
నటీనటులు : సురాజ్ వెంజారమూడ్, సురభి లక్ష్మి. సౌబిన్ షాహిర్, మాముకోయ, జాఫర్ ఇడుక్కి, ఇర్షాద్, బాబూరాజ్, సిద్ధీ కొప్ప, భగత్ మాన్యుల్, సుధీర్ కరమణ తదితరులు
దర్శకత్వం : ఎమ్సీ జోసెఫ్
ఒక్కమాటలో : హార్ట్ టచింగ్ మూవీ
ఎక్కడ చూడాలి? : నెట్ ఫ్లిక్స్
రేటింగ్ : 3.5 /5
–ఆర్కే
