బాలీవుడ్ హీరో అక్షయ్ కుమార్ గురించి ప్రత్యేకించి చెప్పాల్సిన పనిలేదు. రీసెంట్ గా విడుదలైన అతడి సినిమాలన్నీ సూపర్ హిట్స్ అవడంతో.. అతడికి మరింత క్రేజ్ పెరిగింది. చక్కగా ఏడాదికి మూడు నాలుగు సినిమాలు చేస్తూ.. తాను మిగతా హీరోలకన్నా చాలా ప్రత్యేకమని ఎప్పటికప్పుడు నిరూపిస్తూనే ఉంటాడు. అందుకే అతడి తాజా చిత్రం లక్ష్మి కి అంత హైపు క్రియేట్ అయింది. రీసెంట్ గా ఆ సినిమా డిస్నీ హాట్ స్టార్ ఓటీటీలో విడుదలైంది. సౌత్ బ్లాక్ బస్టర్ కాంచనకి ఆ సినిమా రీమేక్ వెర్షన్ అన్న సంగతి తెలిసిందే. ఒరిజినల్ వెర్షన్ ను తెరకెక్కించిన లారెన్సే ఈ సినిమాకి కూడా దర్శకుడు.
విడుదలకు ముందు టైటిల్ విషయంలో వివాదం రేగినా.. నిర్మాతలు రాజీపడి.. అందులోంచి బాంబ్ అనే పదం తొలగించారు. అయితే అలా చేయడం వల్ల ఎలాంటి నష్టం లేకపోయినా.. సినిమా మాత్రం పూర్ రేటింగ్స్ తెచ్చుకొని అక్కీ అభిమానుల్ని నిరాశపరిచింది. క్రిటిక్స్ సినిమాను చీల్చి చెండాడారు. కాంచన లాంటి సినిమా తీసిన దర్శకుడు అక్షయ్ లాంటి హీరోని సరిగ్గా వినియోగించుకోలేకపోయాడనే విమర్శను మూటగట్టుకున్నాడు లారెన్స్. మొత్తానికి సినిమా ఫ్లాప్ అని అందరూ ఒక అభిప్రాయానికి వచ్చేశారు. అయితే సినిమా ఓపెనింగ్స్ విషయంలో అందరికీ షాకిచ్చింది.
తొలి రోజు లక్ష్మి సినిమా రికార్డు వ్యూస్ ను దక్కించుకుందట. ఫస్ట్ డే ఏకంగా… 200 మిలియన్స్ మంది డిన్నీ హాట్ స్టార్ నుంచి లక్ష్మి సినిమాను వీక్షించారని రిపోర్ట్స్ అందాయి. అంతమంది చూసిన సినిమాకి కలెక్షన్స్ ఎంత వచ్చి ఉంటాయో ఊహిస్తేనే మతిపోతుంది. ఇండియన్ కరెన్సీలో చెప్పాలంటే.. ఈ సినిమాకి దాదాపు రూ. 1000కోట్లు వచ్చినట్టు లెక్క. దివంగత నటుడు సుశాంత్ సింగ్ రాజ్ పుత్ నటించిన దిల్ బేచారా మూవీని ఫస్ట్ డే 90 మిలియన్స్ మంది తిలకించారు. ఇప్పుడు అక్కీ భాయ్ లక్ష్మి సినిమా దాన్ని అధిగమించింది. ఈ సినిమా గానీ సూపర్ హిట్టై ఉంటే.. ఇంకెంత వ్యూస్ తో రికార్డులు క్రియేట్ చేసేదో.
