ప్రముఖ సంగీత దర్శకుడు, ఆస్కార్ అవార్డ్ విన్నర్ ఏఆర్ రెహమాన్ సంగీత రంగం నుంచి సాహిత్య రంగంలోకి మారారా? అదేమోగాని ఆయన రచయితగా ‘99 సాంగ్స్’ చిత్రం చేశారు. జియో స్టూడియోస్, ఏఆర్ రెహమాన్ కాంబినేషన్ లో రూపొందిన ఈ చిత్రాన్ని మూడు భాషల్లో విడుదల చేయనున్నారు. విచిత్రం ఏమిటంటే ఈ సినిమాకి కూడా పాటల పేరుతోనే టైటిల్ పెట్టడం. తెలుగు, తమిళ, హిందీ భాషల్లో ఏప్రిల్ 16న ఈ సినిమాని విడుదల చేయడానికి ఏర్పాట్లు చేస్తున్నారు.
ఈ సినిమాకి సంబంధించిన విశేషాలను వివరించేందుకు ఈరోజు ఉదయం హైదరాబాద్ లో ప్రెస్ మీట్ కూడా ఏర్పాటు చేశారు. దీనికి ఎ.ఆర్. రెహమాన్ కూడా హాజరయ్యారు. ఇది ఓ ప్రేమ కథా చిత్రం అని రెహమాన్ అంటున్నారు. పాత తరానికి, కొత్త తరానికి మధ్య మానసిక సంఘర్షణను అనుభవించే ఓ మనిషి కధేఈ సినిమాని జియో స్టూడియోస్ తో కలిసి తన నిర్మాణ సంస్థ వైఎం మూవీస్ తో రెహమాన్ నిర్మించారు.
చాలామంది కొత్త నటీనటులు ఈ సినిమా ద్వారా పరిచయం కాబోతున్నారు. ఈహాన్ భట్ అనే యువకుడు ఈ సినిమా ద్వారా హీరోగా పరిచయమవుతున్నారు. ఈ సినిమాలో సంగీతానికి చాలా ఇంపార్టెన్స్ ఇచ్చారు. దీని ట్రైలర్ కూడా విడుదలైంది. హీరో ఈషాన్ పాత్రకు హీరో సత్యదేవ్ తో డబ్బింగ్ చెప్పించారు. విలేఖరుల సమావేశంలో సంగీత దర్శకుడు కోటి కూడా పాల్గొన్నారు.
సంగీతాన్ని నేను చూసే కోణం మారింది: రెహమాన్
99 సాంగ్స్ సినిమాతో సంగీతాన్ని తను చూసే కోణం మారిందని ఎ.ఆర్. రెహమాన్ అన్నారు. రమేష్నాయుడు, కోటి, చక్రవర్తి లాంటి వారు ఎందరో సంగీతం అందించిన సినిమాలతో తన అనుబంధం కొనసాగుతోందన్నారు. కె.విశ్వనాథ్, బాలచందర్, రాఘవేంద్రరావు, మణిరత్నం లాంటి దర్శకుల నుంచి ఎన్నో విషయాలు నేర్చుకున్నానని అన్నారు. ఇన్నాళ్లూ తాను సంగీతమే ప్రపంచంగా బతికానని, ఆ స్ఫూర్తితోనే ఈ కథ రాశానని చెప్పారు. తన జీవిత ప్రయాణంలో ఎన్నో అనుభవాలను ఎదుర్కొన్నానని, వాటి ఆధారంగా తానీ కథను రాశానని వివరించారు.
‘2001లో నేను లండన్ వెళ్లినప్పుడు నా స్నేహితుడు ఒకరు నీ దగ్గరేమైనా కథ ఉందా? అని అడిగారు. నేను మ్యూజిక్ కంపోజర్ని కదా, నా దగ్గర కథ ఎందుకు ఉంటుంది అనుకున్నా. కానీ తర్వాత జీవితంలో చాలా కథలకు, సంగీతంతో లింకు ఉంటుందనే భావన వచ్చింది. ఆ తర్వాత నేను ఫిల్మ్ మేకింగ్, కెమెరా తదితర విషయాలకు సంబంధించిన వర్క్షాప్స్కు వెళ్లా. ఆ తర్వాతే ఈ కథ రాశా. ఈహాన్ ను హీరోగా తీసుకున్నప్పుడు కథలోని పాత్ర పరంగా సంగీత పరిజ్జానం అవసరమని చెప్పా. దాంతో అతను ఏడాది పాటు సంగీతం నేర్చుకున్నాడు.
నా ఈ ప్రయాణంలో సంగీతాన్ని నేను చూసే కోణం మారింది. కంపోజర్గానే కాకుండా కథకుడిగా, నిర్మాతగా, నటుడిగా మ్యూజిక్ కోణాన్ని చూడటం ప్రారంభించా. హీరోగా ఎవర్ని తీసుకోవాలని అనుకున్నప్పుడు దాదాపు ఏడు వందల నుంచి ఎనిమిది వందల మందిని ఆడిషన్స్ చేశాం. అందరి కుర్రాళ్ల ఫొటోలను చూసే క్రమంలో కాశ్మీర్ నుంచి వచ్చిన ఇహాన్ ఫొటోను చూశా. తను నచ్చడంతో తను హీరోగా ఇందులోకి ఎంట్రీ ఇచ్చాడు’ అని వివరించారు.
సంగీత దర్శకుడు కోటి మాట్లాడుతూ రెహమాన్ ప్రతి పాటనూ హృదయానికి హత్తుకునేలా కంపోజ్ చేస్తాడన్నారు ఇందులో మరోసారి రెహ్మాన్ అద్భుతమైన సంగీతం ఉండేలా చూసుకున్నాడని వివరించారు. కథకుడిగా, నిర్మాతగా మంచి పేరు రావాలని కోరుకుంటున్నానని అన్నారు. ఈ సినిమాలో అవకాశం వచ్చాక ఏడాది పాటు పియానో నేర్చుకున్నానని హీరో ఈహాన్ చెప్పారు. లిరిక్ రైటర్స్ కళాప్రభ, రాకేందు మౌళి తదితరులు కూడా ఈ సమావేశంలో పాల్గొన్నారు.
Also Read :తెలుగు సినిమాకి ఆయన ఓ ‘మెగా లెన్స్’
