గ్రేటర్ ఎన్నికల్లో జనసేన పార్టీ పోటీ నుంచి తప్పుకుని బీజేపీకి మద్దతు ఇస్తున్నట్టు పవర్ స్టార్ పవన్ కళ్యాణ్ ప్రకటించిన విషయం తెలిసిందే. పవన్ ఇలా బీజేపీకి మద్దతు ఇవ్వడం పై ప్రకాష్ రాజ్ మండిపడ్డారు. మీరు ఒక లీడర్ అయ్యుండి.. వేరే పార్టీకి మద్దతు ఇవ్వడం ఏంటి..? 2014లో మోడీకి మద్దతు ఇచ్చారు. ఆతర్వాత 2019లో లెఫ్ట్ పార్టీలో పొత్తు పెట్టుకున్నారు. మోడీని తిట్టారు. ఇప్పుడు మళ్లీ మోడీకి మద్దతు ఇస్తున్నారు. పవన్ కళ్యాణ్ ఓ ఊసరవెల్లి అంటూ ప్రకాష్ రాజ్ విమర్శించారు. ప్రకాష్ రాజ్ ఇలా పవన్ పై విమర్శలు చేయడం పై అభిమానులు చాలా కోపంగా ఉన్నారు. మెగా బ్రదర్ నాగబాబు ప్రకాష్ రాజ్ కి కౌంటర్ ఇవ్వడం కూడా జరిగింది.
ఇదిలా ఉంటే.. పవన్ కళ్యాణ్ నటిస్తున్న ‘వకీల్ సాబ్’ మూవీలో ప్రకాష్ రాజ్ కీలక పాత్ర పోషిస్తున్నారు. ఇప్పటి వరకు పవన్, ప్రకాష్ రాజ్ పై సన్నివేశాలు చిత్రీకరించారు అయితే… ఇంకా నాలుగు రోజులు పాటు వీరిద్దరి పై కొన్ని సీన్స్ చిత్రీకరించాల్సివుంది. త్వరలో షూటింగ్ ప్లాన్ చేస్తున్నారు. ఇప్పుడు వీరిద్దరు షూటింగ్ స్పాట్ లో ఒకరికి ఒకరు ఎదురైనప్పుడు పరిస్థితి ఎలా ఉంటుంది..? అనేది ఆసక్తిగా మారింది. రాజకీయాలు వేరు.. సినిమా వేరు. అయినప్పటికీ… పవన్ ని ఏకంగా ఊసరవెల్లి అనడంతో బాగా హర్ట్ అయ్యాడని సన్నిహితులు చెబుతున్నారు.
ఇలాంటి పరిస్థితుల్లో వీరిద్దరి పై ఇంకా చిత్రీకరించాల్సిన సీన్స్ ఉండడంతో ఎలా ఉంటుందో అని వకీల్ సాబ్ ప్రొడ్యూసర్ దిల్ రాజు టెన్షన్ పడుతున్నారని ఫిల్మ్ నగర్ లో టాక్ వినిపిస్తోంది. వేణుశ్రీరామ్ దర్శకత్వంలో రూపొందుతోన్న ఈ సినిమాని టాలీవుడ్ ప్రొడ్యూసర్ దిల్ రాజుతో కలిసి బాలీవుడ్ ప్రొడ్యూసర్ బోనీకపూర్ నిర్మిస్తున్నారు. మరి.. పవన్, ప్రకాష్ రాజ్ పై చిత్రీకరించనున్న సీన్స్ ఎప్పుడు షూట్ చేస్తారు..? అనేది తెలియాల్సివుది.
Must Read ;- ‘వకీల్ సాబ్’ రిలీజ్ గురించి.. ఇంట్రెస్టింగ్ అప్ డేట్.
