గత కొన్ని రోజులుగా టీఆర్ఎస్కు గడ్డు పరిస్థితులు ఎదురవుతున్నాయి. దుబ్బాక ఉప ఎన్నికలు, గ్రేటర్ హైదరాబాద్ లో సగానికి పైగా సీట్లు కోల్పోవడంతో ఆ పార్టీలో ఏం జరుగుతోందో అన్న చర్చలు మొదలయ్యాయి. ముఖ్యనేతల మధ్య ఆధిపత్య పోరు మొదలైందా అన్న అనుమానాలు వ్యక్తమవుతున్నాయి. బయటకు పెద్దగా అలాంటి పరిస్థితి కనిపించక పోయినా అంతర్గతంగా మాత్రం ఏదో జరుగుతోందంటున్నాయి పార్టీ వర్గాలు.
సిద్దిపేటలో హరీష్కు అవమానం..?
సిద్దిపేటలో నిన్న హరీష్రావుకు తీవ్ర అవమానం జరిగిందని ఆయన అభిమానులు ఆగ్రహం వ్యక్తం చేస్తున్నారు. నిన్న ముఖ్యమంత్రి కేసీఆర్ సిద్దిపేట జిల్లాలో అనేక అభివృద్ధి కార్యక్రమాల్లో పాల్గొన్నారు. సిద్దిపేట కోమటి చెరువు సందర్శన, రైతు వేదిక , డబుల్ బెడ్రూం ఇళ్ల ప్రారంభోత్సవం ఇలా సుడిగాలి ప్రర్యటన చేశారు. ఆర్థిక మంత్రి హరీష్రావే దగ్గరుండి అన్ని ఏర్పాట్లు చూసుకున్నారు. ముఖ్యమంత్రి పర్యటనకు మూడు రోజుల ముందు నుంచి ఆయన అక్కడే మకాం వేసి అన్నీ పర్యవేక్షించారు. ఉదయం నుండి ముఖ్యమంత్రి వెంటే ఉండి ఎక్కడెక్కడ ఎలాంటి అభివృద్ధి కార్యక్రమాలు చేపట్టామన్నది పూస గుచ్చినట్టు వివరించడం స్పష్టంగా కనిపించింది. ఇంత జరిగిన తరువాత ఓ భవనం శంకుస్థాపన కు ముఖ్యమంత్రిని తీసుకు వస్తున్న హరీష్రావుకు తీవ్ర అవమానం జరిగింది. ముఖ్యమంత్రి ముందు నడుచుకుంటూ వస్తున్న హరీష్రావును ఓ సెక్యూరిటీ పక్కకు తోసేయడం కనిపించింది. రెప్పపాటులో జరిగిన ఈ ఘటన అందరిని కలవరపాటుకు గురి చేసింది. చూడకుండా తోసేసాడనుకుంటే .. హరీష్రావు అంటే తెలియని వారు రాష్ట్రంలోనే ఉండరని..అంతేగాక ఉదయం నుండి ముఖ్యమంత్రి వెంటే ఉండటం.. అప్పటి వరకు వారి ముందే నడుచుకుంటూ వచ్చిన హరీష్రావు సెక్యూరిటీకి కనిపించ లేదా అన్నది అందరిలో మెదులుతున్న ప్రశ్న.
Must Read ;- పొత్తు తప్పదా.. బీజేపీ ట్రాప్లో కేసీఆర్, ఎంఐఎం పడినట్టే..
కావాలనా.. పొరపాటా?
రాష్ట్రంలో అతికొద్ది మంది ముఖ్యనేతల్లో మంత్రి హరీష్రావు ఒకరు. టీఆర్ఎస్లో ఆయన మూడో ముఖ్యనేతగా చెలామణి అవుతున్నారు. అలాంటి వ్యక్తికి ఈ రోజు జరిగిన అవమానం కొత్తది కాదంటున్నారు ఆయన సన్నిహితులు. రెండోసారి ప్రభుత్వం ఏర్పాటయ్యాక వెంటనే మంత్రి పదవి ఇవ్వక పోవడం.. చివరి వరకు ఆయన పేరు మంత్రుల జాబితాలో ఉంటుందా లేదా అన్న అనుమానాలు రావడం.. దుబ్బాకలో పార్టీ ఓటమి తరువాత ప్రగతి భవన్కు వచ్చిన ఆయనను ముఖ్యమంత్రే అనరాని మాటలు అన్నారన్న వార్తలు బయటకు పొక్కాయి. దీంతో హరీష్రావుకు టీఆర్ఎస్ లో ప్రాధాన్యత తగ్గించే కుట్రలు జరుగుతున్నాయని ఆయన అనుచరులు అనుమానం వ్యక్తం చేస్తున్నారు. కేసీఆర్ ఉన్నన్ని రోజులు ఆయనకు ఏ ఢోకా లేదని.. ఆయన స్థాయి ఏ మాత్రం తగ్గదని ఆయన అనుచరులు భావిస్తున్నారు. అయితే ముఖ్యమంత్రి ముందే హరీష్కు సొంత నియోజకవర్గంలోనే ఇలా జరగడం హరీష్ అభిమానులకు మింగుడు పడటం లేదు. ఈ ఘటన జరిగిన తరువాత ముఖ్యమంత్రి చేసిన వ్యాఖ్యలు హరీష్ అభిమానులకు కొంత ఉపశమనం కలిగించినా .. జరిగిన ఘటనలు చూస్తుంటే ఎక్కడో ఏదో తేడా కొడుతోందన్న అనుమానాలు వ్యక్తం అవుతున్నాయంటున్నారు. నిజంగానే హరీష్కు పొమ్మన లేక పొగబెడుతున్నారా.. అనుకోకుండానే ఈ ఘటనలు జరుగుతున్నాయా అన్నది తేలాల్సి ఉందంటున్నారు రాజకీయ విశ్లేషకులు.
Also Read ;- ఢిల్లీకి కేసీఆర్ : ఎజెండా అదొక్కటేనా? ఇంకా ఉన్నాయా?
