ప్రేమ ఎంత మధురం.. భజరంగ దళ్ అంత కఠినం?

ప్రేమ- ఇది ఎప్పటికీ ఎవర్ గ్రీన్ పదమే. ఎందుకంటే ఎన్నో సినిమాలకు ఇది కనకవర్షం కురిపించింది.. మరెన్నో కావ్యాలకు అంకురార్పణ చేసింది. మనిషిని దేవదాసును చేసినా, మనసుని పిచ్చిదాన్ని చేసినా అది ప్రేమకు ఉన్న బలమే తప్ప మరేమీ కాదు. మనం బలహీనంగా ఉంటే అది మనల్ని మింగేస్తుంది అనే వారూ ఉన్నారు.

ప్రేమ కోసం మహా మహా యుద్ధాలే సాగాయి. రాజులు, రాజ్యాలు ఈ ప్రేమ యుద్ధంలో మునిగి తేలాయి. అలాంటి ప్రేమకు ఒక్కటంటే ఒక్క రోజు ఉండటంలో తప్పేముంది అంటారా?.. ఏమో అది భజరంగ్ దళ్ వాళ్లే తేల్చాలి. ఫిబ్రవరి 14.. పేమికుల రోజు వచ్చేసింది.. యువత జీవితంలో ప్రేమే ఓ పెద్ద పరీక్ష. ఇందులో పాసైతే ఎందులో తప్పినా చిక్కేమీ లేదనుకుంటారు. ప్రేమ ఇంత మధురమే కాబట్టి దాని మీద సినిమాల్లో ఎన్నో పాటలు కూడా వచ్చాయి.

‘ప్రేమ పక్షులం మనం ఎవరేమన్నా ఇక వినం.. మా బాబు చెప్పినా బ్రహ్మ చెప్పినా ససేమిరా వినం’ అంటూ పాడుకుంటారు ఓ సినిమాలో జంట. ఈ పాటను కొసరాజు రాసినా ఈ ప్రేమ జీవితాల్లో కొసమెరుపు వేరేగా ఉంటోంది. ప్రేమ లేని సినిమా ఉప్పులేని పప్పులాంటిది అని దర్శక నిర్మాతలు అనుకోవచ్చు. జనం చూస్తున్నారంటే దాన్ని అంగీకరించి తీరాలేమో కదా. ఇక తప్పు చేయని ప్రేమ కథలు కూడా ఉంటాయా అంటే చెప్పలేం.

ఈరోజు మనకు ఎవరిచ్చారు?

రోజూ ప్రేమించుకునే వారికి ప్రత్యేకమైన రోజు ఎందుకో? నిజానికి ఈ ప్రశ్నకు జవాబు మన దగ్గర కూడా దొరకదు. ప్రేమకు ఒక లక్ష్యం ఉండాలి, ఆ లక్ష్యానికి ఓ డెస్టినేషన్ ఉండాలి. మూడో శతాబ్దంలోకి వెళదాం. రోమ్ చక్రవర్తి క్లాడియస్ కు పెళ్లి మీద నమ్మకం లేదు. దాంతో ఎవరికీ పెళ్లిళ్లు జరగడానికి వీల్లేదని హుకుం జారీ చేశారు. పెళ్లి చేసుకుంటే సైన్యం బలహీనపడుతుందని ఆయన నమ్మకం.

ఏ బంధమూ లేనివారే చావుకు భయపడకుండా యుద్ధంలో పోరాడగలరనేది ఆయన అభిప్రాయం. అందుకే పెళ్లిళ్లు జరగకుండా చట్టం చేశాడంటారు. ఆయన నిర్ణయాన్ని మత గురువు వాలెంటైన్ వ్యతిరేకించాడు. పెళ్లి చేసుకోడానికి ఇష్టపడేవారికి రహస్యంగా పెళ్లిళ్లు చేశాడు. తన నిర్ణయాన్ని ధిక్కరించిన వాలెంటైన్ పై క్లాడియస్ ఆగ్రహోదగ్రుడు అయ్యాడు. వెంటన్నే ఆయన్ని జైల్లో బంధించాడు. క్రీస్తుశకం 269 ఫిబ్రవరి 14న వాలెంటైన్ కు ఉరిశిక్ష విధించాలని ఆదేశాలు ఇచ్చాడు.

జైలులో ఉండగా జైలు అధికారి కూతురితో వాలెంటైన్ ప్రేమలో పడ్డాడట. ఆమె అంధురాలు కావడంతో తనకు తెలిసిన వైద్యం చేసి ఆమెకు చూపు తెప్పించాడట వాలెంటైన్. ఆ క్రమంలోనే ఇద్దరి మధ్యా ప్రేమ అంకురించింది. తనకు ఉరి శిక్ష పడేముందు ఆమెకు ఓ ప్రేమ సందేశం పంపారట. అందులో ఫ్రమ్ యువర్ వాలెంటైన్ అని రాశాడట. అతనికి ఉరిశిక్ష పడిన రోజు ఫిబ్రవరి 14 కాబట్టి అతని పేరు మీదుగా ఈ వాలెంటైన్ డే ఏర్పడిందని చెబుతుంటారు.

Must Read ;- ప్రేమంటే ఇదేరా అంటున్న ముద్దుగుమ్మలు 

ఒక్క రోజు దూరంగా ఉంటే ఏం పోతుంది?

జంట కన్నుల పంటగా కనిపిస్తే ఓర్వలేని వారు కూడా ఉంటారు. అందుకే ఈ ప్రేమికుల రోజుని ద్వేషించే మనుషులూ, సంస్థలకు కొదవ లేదు. ప్రేమను ద్వేషించే బదులు ప్రేమ కథా వస్తువుతో తెరకెక్కే సినిమాలను కూడా నిషేధించాలి కదా.. అలా చేయరు. ‘కుదిరితే కప్పు కాఫీ.. వీలైతే నాలుగు మాటలు’ అనే డైలాగుల్ని వ్యతిరేకించరు. ఎంచక్కా సినిమాలు, డైలాగులు ఎంజాయ్ చేసేస్తుంటారు. ఈరోజున బహిరంగ ప్రదేశాల్లో జంటలు కనిపిస్తే భరతం పట్టే వారు తయారయ్యారు. అన్నాచెల్లెళ్లు కలిసి కనిపించినా వారి మాటలు వినకుండా ఘనకార్యం చేస్తున్నవారూ ఉన్నారు.

అందుకే మీ ప్రియురాలితో ఈరోజు ఎంచక్కా షికారు చేద్దామనుకుంటే ఒక్క రోజు వాయిదా వేసుకుంటే పోయేదేముంది. ముఖ్యంగా భజరంగ దళ్ ఈ జంటల భరతం పట్టడానికి రెడీ గా ఉంది. బహిరంగ ప్రదేశాల్లో జంటలు కనిపిస్తే తమ పని తాము చేసుకుపోతామని ఇప్పటికే హెచ్చిరకలు జారీ చేసింది. వాలెంటైన్స్ డే మన సంస్కృతి కాదనేది వీరి వాదన. అది పాశ్యాత్య విష సంస్కృతిగా వీరు పేర్కొంటున్నారు. ఈరోజును అమర జవాన్లకు గుర్తుగా అమరవీర్ జవాన్ దివస్ గా జరుపుకోవాలని వారు కోరుతున్నారు. ప్రేమికుల మీద వీరికి ఇంత కసి ఎందుకని వాదించే వారూ ఉన్నారు.

Also Read ;- జీవితంలో ఇదే ఆల్ జీబ్రా.. సెక్స్ లేకుంటే ‘గుండె’ గాభరా

ప్రేమ మధురమైతే మరి బ్రేకప్పో?

ప్రేమించడం తప్పేమీ కాదు. ప్రేమ లేకుంటే మానవ సమాజ మనుగడే లేదు. అయితే ఆ ప్రేమలు వికటించడం వల్లే చిక్కులొస్తున్నాయి. ప్రేమ అంటే యువతీ యువకుల మధ్య శృంగారం అనేలా అర్థం మారిపోయింది. పైగా టీనేజ్ లోనే ప్రేమించుకోవడం మొదలెట్టేస్తున్నారు. ఒకప్పుడు బాల్య వివాహాలను ఆమోదించిన సమాజం టీనేజ్ ప్రేమను ఎందుకు ఆమోదించలేకపోతోందన్న వాదన కూడా వీరి నుంచి వస్తోంది. సాధారణంగా ఈ టీనేజ్ ప్రేమలు ఏవీ నిలబడటం లేదు. అవకాశం దొరికినప్పుడు ఎవరి మధ్య ఆయినా ఆకర్షణ ఏర్పడుతుంది.

అవకాశం లేనప్పుడు ఎలాంటి ప్రేమా ఉండదు. ప్రేమ అనే స్థానంలో లివింగ్ రిలేషన్ షిప్ అనే పదం కూడా వచ్చి చేరింది. స్త్రీలకు ఆర్థిక స్వాతంత్ర్యం వచ్చాక వారి నిర్ణయానికే తల్లిదండ్రులు కూడా ఓటేస్తున్నారు. కాకపోతే ప్రేమకు ఉండే అర్థం మారిపోతోంది. ప్రే అంటే ప్రేమించడం, మ అంటే మరచిపోవడంగా మారిపోయింది. అందుకే ప్రేమ అనే పదం ఎంత మధురంగా వినిపిస్తుందో, బ్రేకప్ అనే పదం అంత చేదుగానూ కనిపిస్తోంది.

ఒక ప్రేమ పెళ్లిగా మారేలోపు ఎన్ని బ్రేకప్ లు ఉంటున్నాయో అంతుబట్టకుండా ఉంది. కొన్నాళ్లు పోతే బ్రేకప్ రోజును కూడా సెలబ్రేట్ చేసుకునే రోజు వచ్చేస్తుందేమో. అందుకే ప్రేమకూ, బ్రేకప్ కూ అంతరం లేని ప్రేమ కావాలి. వివాహం – విడాకులు, ప్రేమ – బ్రేకప్ లాంటి జంట పదాలకు కాలం చెల్లిందని చెప్పుకునే రోజు కోసం అందరూ ఎదురుచూడాలి. ది రిలేషన్ షిప్ బిట్వీన్ టు పర్సన్స్ మస్ట్ బీ లైక్ ఏ ఫిష్ అండ్ వాటర్.. అప్పుడే ఆ వాటర్ లోని షిప్ మునిగిపోకుండా ఉంటుంది. అప్పుడే ప్రేమికుల రోజుకు సరైన నిర్వచనమూ దొరుకుతుంది.

– హేమసుందర్ పామర్తి

Also Read ;-  ప్రేమికుల రోజే మనసు విప్పుతుందట శ్రీముఖి?