ఆర్య హీరోగా తమిళంలో ‘శార్పట్టా పరంబరై’ అనే సినిమా రూపొందుతోంది. K9 స్టూడియోస్ బ్యానర్ పై నిర్మితమవుతున్న ఈ సినిమాకి, పా. రంజిత్ దర్శకత్వం వహిస్తున్నాడు. ఈ సినిమాలో బాక్సర్ పాత్రలో ఆర్య కనిపించనున్నాడు. ఒక మురికివాడకి చెందిన యువకుడు, బాక్సర్ గా ఎలా ఎదిగాడు? ఆ క్రమంలో అతను ఎలాంటి పరిస్థితులను ఎదుర్కొన్నాడు? అనే కథాంశంతో ఈ సినిమా రూపొందుతోంది. ఇప్పటికే ఈ సినిమా నుంచి వదిలిన ఫస్టులుక్ పోస్టర్ కి అనూహ్యమైన స్పందన వస్తోంది. కెరియర్ పరంగా ఇది ఆర్యకి 30వ సినిమా. అందువలన సంఖ్యా పరంగా ఈ సినిమా అభిమానుల దృష్టిలో ప్రత్యేకతను సంతరించుకుంది. సంతోష్ నారాయణ్ సంగీతాన్ని అందిస్తున్న ఈ సినిమాలో, దుషార విజయన్ కథానాయికగా కనిపించనుంది.
దర్శకుడిగా పా.రంజిత్ ఇంతకుముందు ‘కబాలి’ .. ‘కాలా’ సినిమాలు చేశాడు. రజనీకాంత్ కథానాయకుడిగా రూపొందిన ఈ సినిమాలు, ఆయన స్థాయికి తగిన విజయాలను అందుకోలేదు. అయినా రజనీని చాలా కొత్తగా చూపించిన దర్శకుడిగా పా.రంజిత్ మార్కులు కొట్టేశాడు. ఆయన టేకింగ్ ఎలా ఉంటుందనేది తమిళ ప్రేక్షకులకు బాగా తెలుసు. అందువలన సహజంగానే ‘శార్పట్టా పరంబరై’ పై అంచనాలు పెరుగుతున్నాయి. భారీ బడ్జెట్ తో నిర్మితమవుతున్న ఈ సినిమాపై అందరిలోను ఆసక్తి వుంది. ఈ సినిమాతో తప్పకుండా హిట్ కొట్టాలనే పట్టుదలతో పా.రంజిత్ ఉన్నాడని అంటున్నారు. అందుకోసం ఆయన గట్టగానే కసరత్తులు చేస్తున్నాడని చెప్పుకుంటున్నారు.
ఇక ఆర్య విషయానికొస్తే, కొంతకాలంగా ఆయన స్పీడ్ తగ్గిందనే చెప్పాలి. యువ కథానాయకులంతా విభిన్నమైన కథలను ఎంచుకుంటూ .. ప్రయోగాలకు వెనుకాడకుండా ముందుకు వెళుతున్నారు. ఈ నేపథ్యంలోనే రేసులో ఆర్య కాస్త వెనుక బడ్డాడని అనిపిస్తోంది. సోలో హీరోగా అవకాశాల పరంగాను .. విజయాల పరంగాను ఆయన కెరియర్ అంత సంతృప్తికరంగా లేదు. ఈ నేపథ్యంలోనే ‘శార్పట్టా పరంబరై’ లో ఛాన్స్ దక్కింది. ఇక్కడి నుంచి తన సక్సెస్ గ్రాఫ్ ను పెంచుకోవాలనే ఉద్దేశంతో ఆయన ఉన్నాడని అంటున్నారు. ఈ సినిమా కోసం ఆయన చాలా కష్టపడ్డాడనీ, కొత్తగా వదిలిన పోస్టర్ అందుకు నిదర్శనమని కోలీవుడ్లో చెప్పుకుంటున్నారు.
Must Read ;- రజినీ పిలుపు… తమిళనాట ఏ రాజకీయ మలుపు?
