వెంకటేష్ ‘నారప్ప’ (రివ్యూ)

Narappa Movie Review :

మొట్టమొదటిసారిగా విక్టరీ వెంకటేష్ హీరోగా రూపొందిన సినిమా నేరుగా ఓటీటీలో విడుదలైంది. తమిళంలో వెట్రిమారన్ దర్శకత్వంలో రూపొందిన అసురన్ ఆధారంగా ‘నారప్ప’ తెరకెక్కింది. శ్రీకాంత్ అడ్డాల దర్శకత్వంలో రూపొందిన ఈ సినిమా అమెజాన్ ప్రైమ్ ద్వారా ఈరోజు ప్రేక్షకుల ముందుకు వచ్చింది. ఈ సినిమా ఎలా ఉంది? వెంకీ ఎలా చేశారు? శ్రీకాంత్ అడ్డాల ఎలా తీశారు? లాంటి విశేషాలను తెలుసుకుందాం.

కథలోకి వెళితే..

ఇది ఈనాటి కథ కాదు. పోలీసులు నిక్కర్లు వేసకున్న కాలం నుంచి ప్యాంట్లు వేసుకునే కాలం వరకూ సాగే కథ అనుకోవచ్చు. 1980 వ దశకంలో మొదలైన కథ ద్వితీయార్థం 1950లోకి వెళ్లిపోతుంది. కథ రాయల సీమ బ్యాక్ డ్రాప్ అన్నట్లుగా కనిపిస్తుంది. పేద రైతు నారప్ప (వెంకటేష్), అతని భార్య సుందరమ్మ (ప్రియమణి), వారి ఇద్దరు కుమారులు, ఒక కుమార్తెలతో ముడిపడిన కథ ఇది. హత్య చేసిన తన చిన్న కొడుకు సిన్నప్పతో అడువుల్లోకి పారిపోతాడు నారప్ప.

సిన్నప్ప ఆ హత్య చేయడానికి కారణం నారప్ప పెద్ద కుమారుడిని ఆ ఊరి భూస్వామి హత్య చేయడమే. ఈ నేపథ్యంలోనే చిన్న కుమారుడిని రక్షించుకోవడం కోసం నారప్ప ఏం చేశాడు అన్నదే ప్రధాన కథ. తమను తరుముతున్న పోలీసులు, భూస్వామి మనుషుల నుంచి వీరు ఎలా తప్పించుకున్నారు అన్న అంశాన్ని ఆసక్తికరంగా మలిచారు. అసలు నారప్ప ఎవరు? అతని గతం ఏమిటి అనే అంశాలు ఫ్లాష్ బ్యాక్ ఎపిసోడ్ లో వస్తాయి.

ఎలా తీశారు? ఎలా చేశారు?

తమిళంలో అసురన్ పెద్ద హిట్. ధనుష్ కు నటుడిగా మంచి పేరు తెచ్చిన సినిమా ఇది. ఇప్పటికే ఓటీటీలో ఈ సినిమాని చాలా మంది చూశారు. అసురన్ తో నారప్పను పోల్చి చూడటం కొంత ఈ సినిమాకి మైనస్ అవుతుంది. పైగా అసురన్ ను మక్కీకి మక్కీగా దించేశారు. కాకపోతే కథనంలో వేగం మందగించింది. ఆ లోపం తమిళంలో కనిపించదు. నారప్ప గా వెంకటేష్ ఆ పాత్రకు న్యాయం చేశారు. తన ఇమేజ్ ను పక్కన పెట్టి ఈ పాత్రను అంగీకరించినట్టు అనిపిస్తుంది.

కాకపోతే ధనుష్ ను అనుకరించే ప్రయత్నం చేసినట్టు అనిపిస్తుంది. ఫ్యాష్ బ్యాక్ ఎపిసోడ్ అంతగా రక్తి కట్టలేదు. దానికి కారణం కొంత నారప్ప పాత్రను యువకుడిలా చూపించే ప్రయత్నం చేయడం. అక్కడ వెంకటేష్ వయసే మనకు కనిపిస్తుంది. యువకుడిలా కాకుండా మధ్య వయస్కుడిలా కనిపిస్తారు. అతను తన మేనకోడలిని చేసుకోవాలనుకుంటాడు. అక్కడ ఆమె మాత్రం వెంకీ కూతురి వయసున్నట్టు కనిపిస్తుంది. అదే తమిళం విషయానికి వస్తే ధనుష్ యువకుడే కాబట్టి అదక్కడ రక్తికట్టింటి. ఓవరాల్ గా ఈ సినిమాకి ఫాష్ బ్యాక్ ఎపిసోడ్ లో కొన్ని లోపాలున్నాయి. వృద్ద నారప్పగా వెంకీలో కనిపించిన స్పార్క్ యువ పాత్రలో లేదు.

కొన్ని సన్నివేశాల్లో సాగదీత ఉంది. తమిళంనే అనుకరించడం వల్ల కొంత తెలుగు నేటివిటీ మిస్సయినట్టు అనిపిస్తుంది. పైగా కొన్ని పాత్రల్లో తెలిసిన నటుల్ని పెడితే బాగుండేది. రాజీవ్ కనకాల, బ్రహ్మాజీ, రావు రమేష్ లాంటి పాత్రలే మనకు తెలిసిన ముఖాలు. కొందరు తమిళ నటుల్ని ఇందులో తీసుకోవడం కూడా నేటివిటీకి దూరమైనట్టు అనిపిస్తుంది. పోరాట సన్నివేశాలు కృతకంగా కనిపిస్తాయి. బరిసె పోట్లకు చనిపోవాల్సిన పాత్రలు మళ్లీ బతికి బట్టకట్టేస్తాయి. అలాంటి బరిసె పోట్లను చూపించకుండా ఉంటే బాగుండేది. నారప్ప, సిన్నప్ప పాత్రలను చంపేస్తే బాగుండదు కాబట్టి సినిమాని సుఖాంతం చేశారు. నేపథ్య సంగీతం, సినిమాటోగ్రఫీ బాగున్నాయి.

డైలాగుల్లో అంత పంచ్ లేదు. కొంత కసరత్తు జరిగి ఉంటే బాగుండేది. వయసు పైబడినట్టు కనిపించే నారప్ప అంత మందిని ఎలా చావగొడతాడో మనకు అర్థం కాదు. అందుకే లాజిక్ జోలికి వెళ్లకుండా సినిమా చూడటం మేలు. దర్శకుడిగా శ్రీకాంత్ అడ్డాల కొంత స్వేచ్చ తీసుకుని ఉంటే అతనికి కొంత క్రెడిట్ దక్కేదేమో. తమిళం సినిమానే చూపించే ప్రయత్నం చేయడం వల్ల అతని దర్శకత్వ ప్రతిభ ఎక్కడా కనిపించదు. పైగా ఫ్లాప్ ఇమేజ్ తెచ్చుకున్న శ్రీకాంత్ ఈ సినిమాని ఓ సవాలుగా తీసుకుని చేసి ఉంటే బాగుండేది. బహుశా అతనికి ఆ స్వేచ్ఛను నిర్మాతలు ఇవ్వలేదేమో అనుకుని సరిపెట్టుకోవాలి.

Narappa Movie Review :

నటీనటులు: వెంకటేష్, ప్రియమణి, శ్రీ తేజ్, కార్తిక్ రత్నం, నాజర్, రావు రమేష్, రాఖీ, బ్రహ్మాజీ, రాజీవ్ కనకాల తదితరులు
సంగీతం: మణి శర్మ
ఎడిటింగ్: మార్తాండ్ కె. వెంకటేష్
కెమెరా: శ్యాం కె. నాయుడు
నిర్మాతలు: సురేష్ బాబు, కలైపులి థాను
దర్శకత్వం: శ్రీకాంత్ అడ్డాల
విడుదల తేదీ: 20 జులై 2021 (అమెజాన్ ప్రైమ్)
ఒక్క మాటలో: థియేటర్లో కాదు కాబట్టి నారప్పని చూడప్పా
రేటింగ్: 2.75/5

– హేమసుందర్ పామర్తి