మన ఆచారాల్లో ఎంతో గొప్పతనం ఉంది. కానీ వాటి వెనుక ఉన్న అంతరార్థాలు మనకు తెలియదు. మన హిందూ పురాణాల ప్రకారం కొబ్బరి కాయకు ఎంతో ప్రాధాన్యం ఉంది. నిజానికి టెంకాయను మనిషి తలతో పోలుస్తారు.
కొబ్బరి కాయ మీద ఉన్న పీచును మనిషి జుట్టుతో పోలుస్తారు. అంతే కాకుండా గుండ్రంగా ఉండే టెంకాయను మనిషి ముఖంతో, కొబ్బరికాయలో ఉండే నీటిని రక్తంతోనూ పోలుస్తారు. ఇక టెంకాయ వెనుక ఉన్న మూడు రంధ్రాలను బ్రహ్మ, విష్ణు, మహేశ్వరులతో పోలుస్తారు. ఇంకా చెప్పాలంటే ఆ మూడు రంధ్రాలను ఇడ, పింగళ, సుషుమ్న నాడిగానూ చెబుతుంటారు.
ఇక టెంకాయను కొట్టిన తరువాత అందులో ఉండే లేత కొబ్బరిని మనస్సుగా భావిస్తారు. అయితే కొబ్బరిని దేవుడికి కొట్టినప్పుడు మనసులో వున్న కల్మషం, అహంకారం, ఈర్ష్యాద్వేషాలు అన్ని తొలగుతాయని వేద పండితుల మాట. అందుకే కొబ్బరి కాయను ఆలయంలో కొడతారు. మనలోని అహంకారాన్ని పోగొట్టుకుంటేనే గాని భగవంతుడిని దర్శంచుకోలేమని చెప్పే అంతరార్థం కొబ్బరికాయలో దాగుంది.
కొబ్బరి కాయ కుళ్లిపోతే అపచారమా?
కొబ్బరికాయ కొట్టాము.. సరే.. అది చెడిపోతే అపచారమా.. ఇలాంటి భయాలు మనలో చాలా మందిలో ఉన్నాయి. కొబ్బరికాయ చెడిపోతే అపచారం ? అనర్థదాయకమని చాలామంది భయపడుతుంటారు. కొబ్బరికాయను కొట్టినప్పుడు అది బాగా తెల్లగా ఉన్నా, తీర్థం తియ్యగా ఉన్నా అందరం చాలా ఆనందపడతాం. కానీ.. కొబ్బరికాయ చెడిపోతే మాత్రం కంగారే కంగారు. ఏమవుతుందో ఏమో .. దేవుడికి కోపంగాని వచ్చిందా.. ఇలాంటి భయాలు మనల్ని వణికిస్తాయి. వాటికి సమాధానం కూడా చెబుతాను. మీరు అసలు భయపడాల్సిన పనేలేదు. ముందు మీకు కొబ్బరికాయ కొట్టే విధానం కూడా తెలిసి ఉండాలి.
కొబ్బరికాయ కొట్టేముందు ఖచ్చితంగా కొన్ని నియమాలు పాటించి తీరాలి. పూజ చేశాక కొబ్బరికాయ కొట్టడం అనేది మన ఆచారం. పూజ పూర్తయిన తరువాత టెంకాయ కొట్టేశాం, నైవేద్యం పెట్టేశాం, ఇక ఆ నైవేద్యం తినేద్దాం అనుకుంటూ ఉంటారు చాలా మంది. కానీ టెంకాయ కొట్టడంలో కూడా ఒక పద్ధతి ఉంది.. ముందు అది తెలుసుకోండి. శాస్త్రం ప్రకారం కొబ్బరికాయ కొట్టడంలో కొన్ని నియమాలున్నాయి. పూజ సమయంలో కొబ్బరికాయ కుళ్లితే ఎలాంటి దోషమూ ఉండదు. అపచారం అంతకంటే ఉండదు. కాబట్టి దీనిగురించి భయపడాల్సిన పనేలేదు.
ఆలయంలో కొబ్బరికాయ కుళ్లిపోతే ఆ కాయను నీటితో శుభ్రంచేసి మళ్లీ దేవుడికి అలంకరణ చేసి పూజ చేస్తారు కూడా. ఇలా చేయడం వల్ల దోషం చెడిపోయిన కొబ్బరికాయదని, భక్తుడిది కాదని కూడా ఓ సూచన. అలాగే ఇంట్లో పూజ చేసేటప్పుడు కూడా కొన్ని సందర్భాల్లో కొబ్బరికాయ కుళ్లిపోతుంది. అప్పుడు ఏదో పూజలో అపచారం జరిగిందని చాలామంది కంగారు పడుతుంటారు. కానీ.. కంగారు పడాల్సిన అవసరం లేదు. కొబ్బరికాయ చెడిపోయి ఉంటే.. ఆ కుళ్లిన భాగాన్ని తీసేసి.. కాళ్లూ, చేతులు, ముఖం శుభ్రం చేసుకుని పూజామందిరాన్ని కూడా మళ్లీ శుభ్రం చేసి పూజ తిరిగి ప్రారంభిస్తే మంచిది.
ఎలా పట్టుకోవాలి? ఎలా కొట్టాలి?
టెంకాయ కొట్టేటప్పుడు మంచి నీటితో కడిగి ఆ తరువాత టెంకాయ పీచు ఉన్న ప్రదేశాన్ని చేత్తో పట్టుకోవాలి. టెంకాయ కొట్టేటప్పుడు ఆ రాయి ఆగ్నేయ దిశగా ఉండాలి. అంటే మన దేవుడి మందిరం ఈశాన్యంలో ఉందనుకుందాం. మనం తూర్పు తిరిగి కొబ్బిరికాయ కొడుతుంటాం. అంటే మన కూడి చేతి వైపు ఉన్న భాగం ఆగ్నేయం అవుతుంది. కొబ్బిరి కాయను అక్కడ పెట్టి కొట్టాలి. 9 అంగుళాల ఎత్తుపై పెట్టి దాని పైన కొబ్బరికాయను కొడితే మంచిది. కొబ్బరికాయను చేత్తో పట్టుకుని కొట్టేటట్లయితే ఇలా పట్టుకోవాలి. మనం తూర్పు వైపు తిరిగి నిలబడితే దాని మూడు కళ్లు దక్షిణం వైపు ఉండాలన్న మాట.
కొబ్బరి కాయ సరిగ్గా రెండు భాగాలు సమానంగా పగలాలి అంటారు. కొద్దిగా అటూ, ఇటూగా పగిలినాఇబ్బంది అయితే ఏమీ లేదు. అది సమంగా పగలాలి అంటే దాని ఈనెలు ఉన్న భాగం.. ఇదిగో ఇక్కడ కొడితే సమానంగా పగలడానికి అవకాశం ఎక్కువ ఉంటుంది. కొబ్బరికాయ సమానంగా పగలడం వల్ల మనసులోని మన కోరికలు త్వరగా నెరవేరవేరతాయని కూడా చెబుతుంటారు. ఇక కొత్తగా పెళ్లైన వాళ్లు కొట్టిన కొబ్బరికాయలో ‘పువ్వు’ వస్తే అది సంతాన యోగాన్ని ప్రసాదిస్తున్న నమ్మకం కూడా ఉంది. ఒక్కోసారి కొబ్బరికాయ అడ్డంగా కాకుండా నానావంకరలుగా పగులుతుంటుంది. కుటుంబంలో ఎవరు కొబ్బరికాయ కొట్టినా నిలువుగా పగిలితే, ఆ కుటుంబంలోని కూతురు గానీ … కోడలుగాని సంతాన యోగాన్ని పొందుతారనడానికి సూచనగానూ కొందరు భావిస్తుంటారు. ఇలా కొబ్బరికాయ పగిలిన తీరు మన కోరికలు నెరవేరతాయా లేదా అనే విషయాన్ని సూచిస్తుందని చాలామంది బలంగా నమ్ముతారు.
లోపల పువ్వు వస్తే ఫలితం ఏమిటి?
వాహనాలకు కొట్టిన కొబ్బరికాయ చెడిపోతే.. దిష్టిపోయినట్టుగానే భావించండి. కాబట్టి మళ్లీ వాహనాన్ని శుభ్రం చేసి ఇంకో కొబ్బరికాయ కొడితే మంచిది. అంతేకాకుండా టెంకాయను కొట్టినప్పుడు కొంతమందికి అందులో పువ్వు వస్తుంది. మరి కొంతమంది కొట్టినప్పుడు లోపల పెరుగులాగా కనిపిస్తుంది. వీటిని చాలామంది పాజిటివ్ గానే తీసుకుంటుంటారు. కొత్తగా పెళ్ళైన వారు టెంకాయను కొట్టినప్పుడు మధ్యలో పువ్వు వస్తే త్వరలోనే పిల్లలు పుడతారని నమ్ముతుంటారు. కొట్టినపుడు కాయ నిలువుగా పగిలితే ఆ కుటుంబంలోని కూతురుకి గానీ, కొడుకుకి గానీ పిల్లలుపుడతారని భావిస్తారు. ఇంట్లోగానీ, ఆలయంలోగానీ కొట్టిన టెంకాయ కుళ్ళిపోతే దానిని పారేసి చేతులు కాళ్లు కడుక్కుని మళ్లీ పూజ చేస్తే సరిపోతుందని అర్చకులు చెబుతుంటారు.
కొన్నిసార్లు టెంకాయ కొట్టినప్పుడు లోపల నల్లగా ఉంటుంది. అదేదో అశుభం అని భయపడనవసరం లేదు. దానివల్ల ఎలాంటి అశుభాలు జరగవు. అలా కొబ్బరికాయ లోపల నల్లగా ఉంటే ‘శివాయ నమ: ’ అంటూ 108 సార్లు మంత్రం జపిస్తే అంతా మంచే జరుగుతుంది. కొంతమంది టెంకాయ కొట్టినా రెండు చిప్పలను చేత్తో పట్టుకుని పూజ చేస్తుంటారు. పొరపాటున కూడా అలా చేయవద్దు. అలాగే టెంకాయను కొట్టి ఒక గ్లాసులో ఆ నీటిని తీసుకుని వేరుగా ఉంచాలి. పాత్రలోని కొబ్బరి నీటితో మాత్రమే దేవునికి సమర్పించాలి. ఇలా కొబ్బరికాయను నైవేద్యంగా సమర్పించేటప్పుడు ఆ నీటిలో పంచదార వేసి నైవేద్యంగా పెడితే ఇంకా చాలా మంచిది. భవవంతుడికి సమర్పించే ఏ వస్తువు విషయంలోనైనా భయాలు అసలు పనికిరావు.
-హేమసుందర్ పామర్తి
