గురువు, శని – అత్యంత ట్రెండింగులో ఉన్న అంశం ఈ రెండు గ్రహాల కలయిక. నిజానికి అవి కలవకపోయినా ఒకే కక్ష్యలో ఉండటం, ఈ రెండూ అత్యంత సమీపానికి రావడం వల్ల దీనికి ఇంత ప్రాధాన్యం ఏర్పడింది.
క్రీస్తు పుట్టుకకూ, ఈ రెండు గ్రహాల కలయికకూ సంబంధం ఉందా అనే కొత్త అంశం కూడా ఇప్పుడు చర్చనీయాంశం అవుతోంది. ఎందుకంటే ఆకాశంలో ఎంతో కాంతిమంతంగా కనిపించే ఈ గ్రహకూటమిని క్రిస్మస్ స్టార్, బెత్లెహామ్ స్టార్ గానూ పిలుస్తుంటారు. దీన్ని బెత్లెహామ్ ప్రతిరూపంగానూ భావిస్తున్నారు. క్రీస్తు జననానికి ముందు కూడా ఆకాశంలో ఇలాంటి నక్షత్రం ప్రస్తావన ఉంది. దాన్ని పక్కన పెడితే క్రీస్తు పుట్టిన సమయంలోనూ గురువు, శని ఒకే రాశిలో కలిసి ఉన్నాయి. దీన్ని కాకతాళీయం అనుకోవాలా? అనే ప్రశ్నకూడా కలుగుతోంది.
ఆయన జన్మ జాతక చక్రాన్ని పరిశీలిస్తే మనకు ఈ విషయం అర్థమవుతుంది. ఆ జాతక చక్రం దిగువన ఇస్తున్నాం గమనించండి. ఆ జాతక చక్రంలో ఈ రెండు గ్రహాలూ మీన రాశిలో కలిసి ఉన్నాయి. నిజానికి ఈ రెండు గ్రహాలూ ఒక రాశిలో కలవడం అనేది ప్రతి 20 ఏళ్లకూ ఒకసారి మాత్రమే జరుగుతుంది. ఇంత దగ్గరగా రావడం మాత్రం 397 సంవత్సరాలకు ఒకసారి మాత్రమే జరుగుతుంది. మరో విశేషమేమిటంటే క్రీస్తు పుట్టిన ఏడాది కూడా ఇప్పుడున్నట్టుగా అత్యంత సమీపంలోకి ఈ రెండు గ్రహాలూ వచ్చినట్టు తెలుస్తోంది. అందుకే ఆకాశంలో ఓ పెద్ద నక్షత్రాన్ని అక్కడి ప్రజలు గమనించారు.
Must Read ;- క్రిస్మస్ కోసం తన ఇంటిని అందంగా డెకరేట్ చేసిన అక్కినేని వారి కోడలు
ఈ డిసెంబరు నెలలో క్రిస్మస్ సమయంలో ఈ అద్భుతం జరుగుతుండడంతో, రెండు వేల సంవత్సరాల క్రితం ఆకాశంలో కనిపించిన బ్రహ్మాండమైన కాంతి ‘స్టార్ ఆఫ్ బెత్లెహాం’ ఇదే అయి ఉంటుందని కూడా కొందరు భావిస్తున్నారు. ఆ గ్రహ కలయికలకూ, క్రీస్తుకూ సంబంధం ఉందా లేదా అనే విషయాన్ని పక్కన పెడితే ఈ అరుదైన కలయికకు మాత్రం ఓ ప్రత్యేకత కనిపిస్తోంది. ఈ డిసెంబరు 21వ తేదీ రాత్రి 7.30 గంటల వరకూ ఇవి అంత్యంత సమీపంలో ఉంటాయని శాస్త్రవేత్తలు తెలిపారు. జ్యోతిష శాస్త్రం ప్రకారం రాత్రి 10 గంటలకు ఇవి ఒకే డిగ్రీలో ఉంటాయి.
నైరుతి దిక్కులో సాయంత్రం 6.30 గంటల నుంచే ఈ క్రిస్మస్ స్టార్ కనిపించింది. గ్రహాలు మరీ ఇంత దగ్గరగా రావడం మాత్రం అరుదైన విషయమని మాంచెస్టర్ యూనివర్శిటీ ఆస్ట్రోఫిజిసిస్ట్ ఫ్రోఫెసర్ బ్రియన్ వివరించారు. ముఖ్యంగా ఖగోళంలోని సూర్యకుటుంబంలో ఈ రెండు గ్రహాలు చాలా పెద్దవి. గత 800 ఏళ్లలో కూడా ఇవి ఇంత దగ్గరగా లేవని శాస్త్రవేత్తలు అంటున్నారు. మన దగ్గర బైనాక్యులర్ ఉంటే గురు గ్రహం చుట్టూ ఉండే నాలుగు చంద్రుళ్లను కూడా చూడవచ్చని సైంటిస్టు ఎడ్ బ్లూమర్ తెలిపారు.
క్రిస్మస్ స్టార్ ప్రత్యేకత ఏమిటి?
మన బైబిల్ ప్రకారం ఈ క్రిస్మస్ స్టార్ ముగ్గురు జ్ఞానులను శిశువు ఏసుకు మార్గనిర్దేశం చేసేలా చేసిందంటారు. మానవ జాతికి దీన్ని ఓ ఆశాకిరణంలానూ చెబుతుంటారు. క్రిస్మస్ సమయంలో కొవ్వొత్తులను వెలిగించడం కూడా ఈ క్రిస్మస్ స్టార్ కు ప్రతీకగా భావిస్తుంటారు. ఆ కొవ్వొత్తుల స్థానంలో చిన్న చిన్న లైట్లను ఇప్పుడు వెలిగిస్తున్నారు. స్టార్ ఆకారంలో అలంకరణలు కూడా చేస్తుంటారు. గురువు ఆకాశంలో ఓ వృత్తాకారాన్ని చుట్టి రావడానికి 12 సంవత్సరాలు పడుతుంది, శనికి 30 ఏళ్లు పడుతుంది.
ప్రతి 20 ఏళ్లకూ ఈ రెండు గ్రహాలూ ఏదో ఒక చోట కలుస్తుంటాయి. ఇంకా చెప్పాలంటే ఒక వ్యక్తి జనన సమయంలో ఈ రెండు గ్రహాలూ ఏ రాశిలో ఉన్నాయో అతని షష్టిపూర్తి సమయంలోనూ అదే రాశిలో ఉంటాయి. ఇంతకుముందు ఈ రెండు గ్రహాలూ 1623 జులై 16న ఇంత సమీపంలో కనిపించాయి. ఇవి కొన్ని ప్రాంతాల్లో మరింత కాంతిమంతంగా కనిపిస్తాయి. క్రీస్తు పుట్టింది బెత్లెహామ్ లో కాబట్టి అక్కడ మరింత కాంతిమంతంగా ఈ రెండు గ్రహాలూ ఒకే పెద్ద నక్షత్రంగా కనిపించడానికి అవకాశం ఎక్కువగా ఉంది. ఆయా ప్రాంతాలు సూర్య కాంతికి దగ్గరగా ఉండటం కూడా కొంత కారణం.
నాసా వారి లెక్కలు ఏమంటున్నాయి?
ఈ డిసెంబరు 21న ఈ గురు, శని కలయిక ఒక డిగ్రీలో పదోవంతు దూరం ఉందని అంచానా వేశాయి. మన సాధారణ కంటితో కూడా వీటిని చూడవచ్చు. మార్చి 5, 1226లో కూడా ఈ రెండు గ్రహాలూ ఇలా అత్యంత సమీపంలోకి వచ్చాయి. క్రీస్తు జనన సంవత్సరంలో ఇలాగే అత్యంత సమీపంలో ఈ గ్రహాలు కనిపించాయి అనడానికి ఆధారాలు ఉన్నాయి. ఆ తర్వాత 372 మార్చి నెలలోనూ ఇలా సమీపంలో కలిశాయి. 431 డిసెంబరు 31, , 769 జులై 23, 1226 మార్చి 5, 1623 జులై 16, 2020 డిసెంబరు 21, 2080 మార్చి 15, 2417 ఆగస్టు 24, 2477 జులై 6, 2874 డిసెంబరు 25న ఇలాంటి కలయిక ఉంది. మరో విశేషమేమిటంటే 2874లో సరిగ్గా క్రిస్మస్ రోజునే ఈ గ్రహకలయిక రాబోతోంది. ఇది కూడా కాకతాళీయమే అనుకోవాలేమో. మానవాళికి మాత్రం ఈ గ్రహ కలయిక ఆశాకిరణం అనే భావిద్దాం.
– హేమసుందర్ పామర్తి
Also Read ;- ఇది సర్కారు వారి చర్చి.. రండి.. తరించండి!
Jupiter & Saturn in conjunction early this evening! 45 minutes after sunset, around 5:15 p.m., look low in the southwest. You need a clear sightline, i.e. no mountains or buildings in your way. By 7:00 p.m. the planets dip below the horizon, so the Christmas Star won't last long. pic.twitter.com/NJ9WvYq775
— Justin Bruce (@just1nbruce) December 21, 2020