తెలుగు రాష్ట్రంలో సమవుజ్జీలైన ఎన్టీఆర్, ఏయన్నార్ సినిమాల్లో సమవుజ్జీలైనా ఒక్కరు మాత్రమే రాజకీయాల్లోకి దిగారు. అక్కినేని నాగేశ్వరరావు రాజకీయ రొంపిలోకి దిగలేదు.
ఇద్దరు సమవుజ్జీలు ఒకేసారి రాజకీయ బరిలో ఉంటే ఎలా ఉంటుంది అనేది ఈసారి తమిళనాడు రాజకీయ బరిలో మనం చూడబోతున్నాం. మీకు రజినీ నచ్చుతాడా? కమల్ నచ్చుతాడా? అనే అంశం ఇప్పుడు ట్రెండింగులో ఉంది. ఒక విధంగా చెప్పాలంటే రజినీ కన్నా కమల్ సినిమా రంగంలో సీనియర్. 1960 నుంచే బాలనటుడిగా బరిలో ఉన్నారు. 1975లో అపూర్వరాగంగళ్ సినిమా ద్వారా వీరిద్దరూ కలిసి నటించారు. రజినీకి ఇదే మొదటి సినిమా. ఇద్దరూ కలిసి ఎన్నో మల్టీస్టారర్ సినిమాలు చేశారు. ఇప్పుడు రాజకీయ పయనంలో కలుస్తారా లేదా అన్నది మాత్రం సస్పెన్సే.
మల్టీస్టారర్ రాజకీయం
కమల్, రజినీ.. ఇద్దరూ మల్టీస్టారర్ సినిమాలు చేసినా ఈ ఇద్దరితో మల్టీస్టారర్ రాజకీయం కుదురుతుందా లేదా అన్నది మాత్రం ఇప్పుడే చెప్పలేం. కాకపోతే రజినీ కన్నా ముందే కమల్ పార్టీ పెట్టడం, ఎన్నికల్లో తన స్టామినా ఎంతో తెలుసుకోవడం కూడా జరిగింది. పార్టీల పరంగా ఈ ఇద్దరికీ భావసారూప్యం ఎంతవరకు ఉంది అన్నది కూడా చూడాలి. ఓ పక్క రజినీ వెనక భారతీయ జనతా పార్టీ ఉందనే ప్రచారం సాగుతోంది. కమల్ మాత్రం భాజపాను తీవ్రంగా వ్యతిరేకిస్తుంటారు.
Must Read ;- రజనీకాంత్ చరిత్ర సృష్టిస్తారా..? చరిత్రలో కలిసిపోతారా..?
కమల్ స్ఠాపించిన మక్కల్ నీది మయ్యం పార్టీకీ, రజనీ మక్కల్ మండ్రం పార్టీకీ పేరులోనే సారూప్యం ఉంది.. భావాల పరంగా మాత్రం దూరానికే అవకాశం ఎక్కువ. ఓ పక్క రజినీ ఆధ్యాత్మిక రాజకీయం అనే మాట వాడుతున్నారు. ఇంకో పక్క తన పార్టీకి చీఫ్ కోఆర్డినేటర్ గా తమిళనాడులో భాజపా ఇంటలెక్చువల్ వింగ్ లో పనిచేసిన అర్జునమూర్తిని తీసుకున్నారు. పార్టీ పేరును ఈ నెల 31న అధికారికంగా వెల్లడిస్తారు. తమిళనాడులో ఇలాంటి భావజాలం పనిచేస్తుందా అన్న సందేహం ఇంకో పక్క ఉంది. ద్రవిడ పార్టీల వాసనలో మునిగితేలిన తమిళజనులకు ఇది కొత్త పార్టీగానే భావించాలి. పైగా రజినీ పార్టీ గుర్తుగా సైకిల్ అనే మాట వినిపిస్తోంది.
అన్నామలై సినిమాలో రజనీ వాహనం సైకిల్. పార్టీ గుర్తు అంశంపై ప్రస్తుతం చర్చ జరుగుతోంది. కమల్ పార్టీలో ద్రవిడ వాసనలు ఉంటాయి. అబ్దుల్ కలామ్ స్ఫూర్తి ఆ పార్టీకి ఉంది. ఆమ్ ఆద్మీ పార్టీ నేత కేజ్రీవాల్ సమక్షంలో కమల్ తన పార్టీని ప్రారంభించారు. అయితే ప్రస్తుతం ఈ పార్టీకి లభించిన స్పందన అంతంత మాత్రమే. దాంతో కమల్ కూడా ఇంకొకరితో కలిసి ముందుకు వెళ్లే ఆలోచనలో ఉన్నారు. ఆ ఇంకొకరు రజినీ అవుతారా లేదా వేరెవరైనానా? అన్న ప్రశ్నలు ఉన్నాయి. రజినీతో కలవడానికి తనకు అభ్యంతరం లేదని కూడా కమల్ ఓ సందర్భంలో ప్రకటించారు. వయసురీత్యా కమల్ కంటే రజినీ నాలుగేళ్లు పెద్ద.
Also Read ;- మళ్లీ వార్తల్లోకి ‘భారతీయుడు 2’.. అసలు ఈ మూవీ ఉందా.? లేదా.?
ఈరోజు రజినీ కాంత్ పుట్టిన రోజు. నటుడిగా సినిమా రంగంలో 45 ఏళ్ల ప్రయాణం పూర్తయింది. మనకు ఊహ తెలిసినప్పటి నుంచి తమిళనాడులో సినిమా రాజకీయానిదే పైచేయిగా ఉంటూ వస్తోంది. ముఖ్యంగా తమిళనాడులో రాజకీయ దిగ్గజాలు కరుణానిధి, జయలలిత చనిపోయిన తర్వాత రాజకీయ శూన్యత కూడా ఉంది. ఏఐఏడీఎంకే, డీఎంకే పార్టీలూ రెండూ అంతర్గత కుమ్ములాటల్లో ఉన్నాయి. రజినీకి రాజకీయంగా ఇది అనుకూల సమయంగానే చెప్పాలి. కమల్ పార్టీని బలోపేతం చేసే దిశగా ప్రయత్నాలు చేయాల్సి ఉంది. కమల్, రజినీ సినిమాల్లో సూపర్ స్టార్లే కావచ్చు.. రాజకీయాల్లో వీరి సత్తా ఏమిటన్నది మాత్రం ప్రశ్నగానే చెప్పాలి.
1990 వరకూ రజినీ కాంత్ సినిమాల్లో రాజకీయాల ప్రస్తావనే లేదు. పనక్కరన్ అనే సినిమాలోనే మొదటి సారిగా రాజకీయపరమైన డైలాగులు ఉన్నాయి. ‘నేను కోరుకుంటే తేలిగ్గా నాయకుడిని అవుతా’ అనే డైలాగ్ ఇందులో ఉంది. అలాగే వల్లి అనే సినిమాలోనూ ఇలాంటి అంశాలున్నాయి. ఇది 1993లో వచ్చింది. దీనికి ఆయనే స్వయంగా డైలాగులు రాశారు. ఆయన ఎక్కువగా రాజకీయ అంశాలను ప్రస్తావించిన సినిమా ఇదే. కమల్ సినిమాల్లో చాలా కాలం నుంచే రాజకీయపరమైన డైలాగులు ఉన్నాయి. కాకపోతే రజినీ మొదటి నుంచి రాజకీయాలపై ఊగిసలాట ధోరణిలోనే ఉండేవారు.
ఆ మధ్య వచ్చిన ‘కథానాయకుడు’ అనే సినిమాలో ఏకంగా ఇలాంటి డైలాగునే ఆయన మీద పెట్టేశారు. మీరు గంటకోరకంగా మాట్లాడతారు అనే ఓ పాత్ర రజినీని ప్రశ్నించే డైలాగ్ ఇది. దేవుడు శాసిస్తే తను ఏమైనా చేస్తానంటాడు రజినీ. ఉజైపాలి అనే సినిమా ఓ డైలాగ్ ఉంది. ‘అతను నిన్నూ, నన్నూ కూలీగా చేశాడు.. ఈరోజు నన్ను నటుడిని చేశాడు.. రేపు ఏంచేస్తాడో’ అనే డైలాగ్ ఉంది ఇందులో. తన సినిమాల ద్వారా రజినీ ఇన్ డైరెక్ట్ సందేశాలు ఎప్పట్నుంచో ఇస్తూ వస్తున్నాడు. కమల్ మాత్రం 1980 నుంచే తన సినిమాల్లో రాజకీయ పరమైన డైలాగులు వల్లించాడు. రుమయిన్ నిరం శివప్పు (1980) లో ఓ నిరుద్యోగ యువకుడి పాత్రను పోషించాడు.
రాజకీయ నాయకులు తమ వ్యక్తిగత లాభాల కోసం యువతను ఎలా తప్పుదోవ పట్టించారో ‘సత్య’ సినిమాలో చూపించారు. ఆయన డైలాగులు కూడా దీనిమీదే ఉంటాయి. 1992లో వచ్చిన దేవరమగన్ సినిమాలో కూడా హింసాత్మక కుల సంఘర్షణలను చూపించారు. మహానది, భారతీయుడు, హేరామ్.. లాంటి సినిమాలన్నిటిలోనూ కమల్ రాజకీయ పరమైన సందేశాల తోనే ఉంటాయి. మరి తమిళ జనం ఈ ఇద్దరు మహానటులను రాజకీయంగా ఎలా చూస్తుందో 2021 ఏప్రిల్ లో జరిగే ఎన్నికల్లో గానీ తెలియదు.
తెలుగులో ఎన్టీఆర్ పార్టీని సైకిల్ గుర్తుపై పోటీ చేసి ఆరు నెలల్లో ముఖ్యమంత్రి పీఠాన్ని అధిష్ఠించారు. ఇప్పుడు రజినీ కాంత్ కూడా పార్టీ ప్రకటించి ఈయన కూడా సైకిల్ గుర్తుపైనే పోటీ చేసి అధికారంలోకి వస్తే మాత్రం ఎన్టీఆర్ రికార్డును బ్రేక్ చేసినట్టే అవుతుంది. ఎందుకంటే నాలుగు నెలల్లోనే ఈయన అధికారంలోకి వచ్చే అవకాశం వస్తోంది. ఆయన తాజా సినిమా ‘అన్నాత్తే’లో ఎన్ని రాజకీయ పరమైన డైలాగులు ఉన్నాయోనన్న ఆసక్తి అందరిలోనూ నెలకొంది.
-హేమసుందర్ పామర్తి
Also Read ;- రజినీ పిలుపు తమిళనాట ఏ రాజకీయ మలుపు?
