సూపర్ స్టార్ రజనీకాంత్.. రాజకీయాల్లోకి వస్తారా..? రారా..? ఇది గత కొన్ని సంవత్సరాలుగా నలుగుతున్న.. వార్తల్లో నిలుస్తున్న ప్రశ్న. ఎలాంటి నిర్ణయం తీసుకోవాలో ఇన్నాళ్లు రజనీ తేల్చుకోలేకపోయారు. అయితే… ఎట్టకేలకు ఈ ప్రశ్నకు సమాధానం దొరికేసింది.
రజనీకాంత్ రాజకీయ ప్రవేశం పై క్లారిటీ ఇచ్చేశారు. ఇంకా చెప్పాలంటే.. అభిమానులకు కొత్త సంవత్సర కానుకలా రాజకీయాల్లోకి వస్తున్నానని స్వయంగా రజనీకాంత్ రివీల్ చేశారు. దీంతో అభిమానుల ఆనందానికి అవధులు లేవు. ఊరించి ఊరించి ఉసూరు మనిపించకుండా.. అభిమానులు ఆశించినట్టుగానే పార్టీ పెడుతున్నాను.. వచ్చే ఎన్నికల్లో పోటీ చేస్తున్నాను అని ప్రకటించేశారు.
రజనీకాంత్ పార్టీ పెడుతున్నాను అని ప్రకటించడంతో ఇప్పుడు అభిమానుల్లోను, రాజకీయ, సినీ విశ్లేషకుల్లోను.. ఇంకా చెప్పాలంటే అందరిలో ఒకటే ప్రశ్న.. సినిమా రంగంలో చరిత్ర సృష్టించిన రజనీకాంత్.. రాజకీయ రంగంలో చరిత్ర సృష్టిస్తారా..? చరిత్రలో కలిసిపోతారా..? అని. కారణం ఏంటంటే.. సినిమా హీరోలకు ఓట్లు వేసే రోజులు పోయాయి. కాలం మారింది.. ప్రజల ఆలోచనా విధానంలో మార్పు వచ్చింది. అలాగే రాజకీయాలు రాజకీయ నాయకుల్లో కూడా చాలా మార్పు వచ్చింది. రాజకీయం అంటే సేవ చేయడానికి అదో గొప్ప అవకాశం ఒకప్పుడు.. కానీ.. ఇప్పుడు డబ్బులు సంపాదించుకోవడాని… ఇంకా చెప్పాలంటే డబ్బులు దోచుకుని దాచుకోవడానికి.. రాజకీయం ఒక ఫ్రొఫెషన్ అయ్యిందని చాలా మంది అభిప్రాయం.
ఎం.జీ.ఆర్, ఎన్.టి.ఆర్ టైమ్ లో సినిమా హీరోలను దేవుళ్లులా చూసేవాళ్లు. అంతగా ఆరాధించేవారు.. ఆదరించేవారు. అందుకనే తమిళనాడులో ఎం.జి.ఆర్, తెలుగులో ఎ.టి.ఆర్ రాజకీయాల్లోకి ప్రవేశించి చరిత్ర సృష్టించారు. అది వాళ్లతోనే ఎండ్ అయ్యింది. ఆతర్వాత తెలుగులో మెగాస్టార్ చిరంజీవి రాజకీయాల్లోకి ప్రవేశించారు. ప్రజారాజ్యం పార్టీ స్ధాపించారు కానీ.. అధికారంలోకి రాలేకపోయారు. ఆతర్వాత ప్రజారాజ్యం పార్టీ జెండా పీకేయడం.. కాంగ్రెస్ పార్టీలో విలీనం చేయడం తెలిసిందే. ఆతర్వాత తమ్ముడు పవన్ కళ్యాణ్ జనసేన పార్టీ పెట్టారు. గత ఎన్నికల్లో రెండు స్ధానాల్లో పోటీ చేసారు. పార్టీ అధ్యక్షుడు అయిన పవన్ కళ్యాన్ రెండు స్ధానాల్లో పోటీ చేస్తే.. రెండు స్ధానాల్లో ఓడిపోవడం తెలిసిందే.
అలాగే తమిళనాడులో శరత్ కుమార్, విజయ్ కాంత్, కమల్ హాసన్ తదితరులు రాజకీయాల్లో ప్రవేశించడం.. ఓడిపోవడం తెలిసిందే. అలాగే కర్నాటకలో హీరో ఉపేంద్ర కూడా పార్టీ పెట్టారు. ఏమాత్రం ప్రభావం చూపించలేకపోయారు. దీంతో రజనీకాంత్ రాజకీయాల్లో సక్సస్ సాధిస్తారా..? లేదా..? అనేది ఆసక్తిగా మారింది. వచ్చే సంవత్సరం ప్రారంభంలో తమిళనాడులో ఎన్నికలు రానున్నాయి. ప్రచారానికి చాలా తక్కువ టైమ్ ఉంది. ఇలాంటి పరిస్థితుల్లో రజనీకాంత్ రాజకీయాల్లో ఏ మేరకు ప్రభావం చూపించగలరు అనేది ఆసక్తిగా మారింది. మరి… రజనీ రాజకీయాల్లో చరిత్ర సృష్టిస్తారో..? చరిత్రలో కలిసిపోతారో..? తెలియాలంటే తమిళనాడులో ఎన్నికలు జరిగే వరకు ఆగాల్సిందే.
Must Read ;- తమిళనాట రాజకీయంలో ‘రజనీ’కాంతుల మాటేమిటి?
