తొలి సినిమా ‘ఉప్పెన’తోనే మంచి హిట్ కొట్టిన మెగా మేనల్లుడు వైష్ణవ్ తేజ్ రెండో సినిమా ‘కొండపొలం’తో ప్రేక్షకుల ముందుకు వచ్చారు. వైష్ణవ్ సరసన రకుల్ హీరోయిన్ గా నటించిన ఈ సినిమాకి క్రిష్ దర్శకత్వం వహించారు. ఈ సినిమా శుక్రవారం ప్రేక్షకుల ముందుకు వచ్చింది. సన్నపురెడ్డి వెంకటరామిరెడ్డి రాసిన ‘కొండపొలం’ న‌వ‌ల ఆధారంగా ఈ సినిమా రూపొందించారు. ఫస్ట్ ఫ్రేమ్స్ ఎంటర్ టైన్ మెంట్స్ సంస్థ ఈ సినిమాని నిర్మించింది. మరి ఈ సినిమా ఎలా ఉందో చూద్దాం.
కథలోకి వెళితే..
రవీంద్ర యాదవ్ రాయలసీమ ప్రాంతానికి చెందిన కుర్రాడు. ఇంజినీరింగ్ చదువుకుని హైదరాబాద్ లో ఉద్యోగం కోసం ప్రయత్నం చేస్తాడు. ఉద్యోగం కష్టమని భావించి మళ్లీ సంతూరుకు వెళతాడు. అక్కడ తాత రోశయ్య (కోట శ్రీనివాసరావు) వ్యవసాయ పరమైన సలహా ఇస్తాడు. అదే కొండపొలం సాగు. అతను గొర్రెలకాపరిగా మారల్సి వచ్చింది. గొర్రెల మందతో నల్లమల అడవుల్లోని కొండపొలంపైకి వెళ్లి సాగు చేసే పని చేపడతాడు.
అక్కడ అతనికి ఓబులమ్మ (రకుల్ ప్రీత్ సింగ్) తో పరిచయం ఏర్పడుతుంది. కొండపొలం సాగులో అతనికి ఎదురైన కష్టాలేమిటి? ఓబులమ్మతో ప్రేమ వ్యవహారం ఎలాంటి మలుపులు తిరిగింది? లాంటి అంశాలతో ఈ కథ సాగుతుంది. కొండపొలం సాగు ఎలా ఉంటుందో చక్కగా చూపించే ప్రయత్నం చేశారు. ప్రకృతిని ఎలా కాపాడుకోవాలో చెప్పే కథ ఇది. గొర్రెల కాపరుల కష్టాలు, అడవులను ఎలా రక్షించుకోవాలో చెప్పే ప్రయత్నంతో ఈ కథ సాగుతుంది.
ఎలా తీశారు? ఎలా చేశారు?
కథ, కథనాల మీద దర్శకుడికి క్లారిటీ ఉంటే ఎలా ఉంటుందో కొండపొలం అలాగే ఉంది. తాను చెప్పదలుచుకున్న విషయం మీదే దర్శకుడు క్రిష్ దృష్టిపెట్టారు. కథలో ఎక్కడా డైవర్షన్స్ లేవు. స్క్రీన్ ప్లే విషయంలోనూ బిగువు సడలకుండా జాగ్రత్తలు తీసుకుని కథను నడిపించారు. నూటికి నూరు శాతం కొండపొలం నవలకు దర్శకుడు న్యాయం చేశారు. కథలో కొత్తదనం, నటనకు అవకాశం ఉన్న పాత్రలు వెరసి కొండపొలం సినిమా. టైటిల్ చూసి ఇదో ఆర్ట్ సినిమా అనుకుంటే పొరపాటే. ఉప్పెన తర్వాత మరోసారి నటనకు అవకాశం ఉన్న పాత్రను వైష్ణవ్ పోషించారు.
మొదటి సినిమాలతోనే విభిన్నమైన పాత్రలను ఎంచుకోవడం వైష్ణవ్ అభిరుచికి అద్దంపడుతోంది. వైష్ణవ్ ఈ సినిమాలో కూడా తన పాత్రకు ప్రాణం పోశాడు. కళ్లతోనే భావాలు పలికించాడు. మొదట్లో పిరికి వాడిగా, ఆ తర్వాత పట్టుదల పెరిగిన వాడిగా ఈ పాత్ర సాగుతుంది. ఇక ఓబులమ్మగా రకుల్ కూడా ఆ పాత్రలో ఒదిగిపోయింది. ఈ ఇద్దరూ ఈ సినిమాకి ప్రాణం పోశారు. అంతకన్నా ముఖ్యమైన పాత్ర సాయిచంద్ ది. హీరో తండ్రిగా నటించారు. కచ్చితంగా అవార్డుకు అర్హమైన పాత్ర ఇది. మనసును తాకే సంభాషణలు, కీరవాణి సంగీతం ఈ సినిమాని మరో మెట్టు పైన నిలిపాయి. సినిమా ప్రథమార్థం బాగా ఆకట్టుకుంది. ద్వితీయార్థంలో కథ మందగించింది.
నటీనటులు: పంజా వైష్ణవ్ తేజ్, రకుల్ ప్రీత్ సింగ్, సాయిచంద్, కోట శ్రీనివాసరావు, నాజర్, అన్నపూర్ణ, హేమ, మహేష్ విట్టా, రవి ప్రకాష్ తదితరులు.
సాంకేతికవర్గం: కథ: సన్నపురెడ్డి వెంకటరామిరెడ్డి, సంగీతం: ఎం.ఎం. కీరవాణి, సినిమాటోగ్రఫీ: జ్ఞానశేఖర్ వి.ఎస్, ఎడిటర్: శ్రవణ్ కటికనేని
నిర్మాతలు: సాయిబాబు జాగర్లమూడి, రాజీవ్ రెడ్డి
స్క్రీన్ ప్లే, దర్శకత్వం: క్రిష్ జాగర్లమూడి
విడుదల: 08-10-2021
ఒక్క మాటలో: కొండపొలం సాగు బహు బాగు
రేటింగ్: 3/5
– హేమసుందర్ పామర్తి
Must Read ;- ప‌వ‌ర్ స్టార్.. దేవ క‌ట్టా కాంబో మూవీ ?
