లూడో- ఈ పేరు వినగానే ఈ మధ్యే పాపులర్ అయిన గేమ్ గుర్తొస్తుంది. ఇది కూడా ఓ క్రైమ్ ఆటే. రచయిత, దర్శకుడు అనురాగ్ బసు చేసిన సరికొత్త ప్రయోగం ‘లూడో’ సినిమా. ఈ సినిమా నెట్ ఫ్లిక్స్ ద్వారా విడుదలైంది. ఇందులో బసు ఎలాంటి ప్రయోగం చేశాడు, దాన్ని ప్రేక్షకులు ఏమేరకు రిసీవ్ చేసుకుంటున్నారో చూద్దాం.
కథలోకి వెళితే..
వివిధ కథలను ఒక తాటిపైకి తెచ్చిన సినిమా ఇది. ముఖ్యంగా నలుగురి కథ ఓ భయంకర నేరగాడితో ముడిపడి ఉంటుంది. సత్తు భయ్యా (పంకజ్ త్రిపాఠి) చేసే దారుణ హత్యతో కథ ప్రారంభమవుతుంది. అతను ఓ బిల్డర్ ను చంపుతాడు. ఆ హత్యను చూసిన రాహుల్ (రోహిత్ సురేష్)ని తన దగ్గరే ఉంచుకుంటాడు. ఈ హత్యతో తమకు సంబంధం లేకపోయినా తమ వ్యక్తిగత సమస్యలతో ఆకాష్ (ఆదిత్య కపూర్), బిట్టు (అభిషేక్ బచ్చన్), అలోక్ (రాజ్ కుమార్ రావు) లు సత్తూ భయ్యా దగ్గరకు వస్తారు. అక్కడ బాంబ్ పేలుడు జరుగుతుంది.
సత్తు భయ్యా చేసిన హత్య వీరందరి జీవితాల్లో ఎలాంటి మార్పులు తెచ్చిందన్నది ఇందులో కీలకం. ఈ హత్య కేసులో ఇరుక్కున వీరు అందులోంచి ఎలా బయటపడ్డారనేది చూడాల్సిందే. ఆ హత్యకు సమాంతరంగా మరికొన్ని కథలు, పాత్రలు, పరిస్థితులు ఏర్పడతాయి. ఆకాష్ (ఆదిత్య రాయ్ కపూర్), అహానా (సన్యా మల్హోత్రా)ల లైంగిక సంబంధానికి సంబంధించి వీడియో క్లిప్ ఇంటర్నెట్లో వైరల్ అవుతుంది.
అహానా వివాహం మరి కొద్దిరోజుల్లో మరో వ్యక్తితో జరగాల్సి ఉంది. దాంతో వారు ఏంచేశారు? అనే ప్రశ్న ఒకటి. మరో కథలోకి వెళితే మాజీ నేరగాడు బిట్టు (అభిషేక్ బచ్చన్) ఆరేళ్ల తర్వాత జైలు నుంచి విడుదలవుతాడు. అప్పటికే అతని భార్య వేరే వ్యక్తితో సెటిలైపోయి ఉంటుంది. దాన్ని అతను ఎలా రిసీవ్ చేసుకున్నాడు అనేది మరో కథ. ఇలా ఈ కథలన్నీ చివరికి సత్తూ భాయ్ వద్దకు చేరేలా చేస్తాయి.
ఎలా తీశారు? ఎలా చేశారు?
వేర్వేరు జీవితాలను ఒకే చోట కలపడం అనే ఈ కథా వస్తువుకు నటులంతా చక్కగా సరిపోయారు. రాజ్ కుమార్ రావు దిలీప్ కుమార్ ను అనుకరిస్తూ చేసే ఇమిటేషన్ ఆకట్టుకుంటుంది. ఫాతిమా సన షైక్, పంకజ్ త్రిపాఠి నటన కూడా హైలైట్ గా నిలుస్తుంది. సమకాలీన జీవితాలను ఈ కథలోకి చొప్పించడంతో కథకు కొత్తదనం వచ్చింది. మనుషుల మనస్తత్వాలు ఎలా ఉంటాయో అండర్ కరెంట్ గా చెప్పారు. ద్వితీయార్థంలో కొంత సాగదీత కనిపిస్తుంది. ప్రీతమ్ మ్యూజిక్ మరో హైలైట్ గా నిలుస్తుంది. ప్రతి కథలోని కీలక అంశాలు సినిమా మీద ఆసక్తిని పెంచేలా చేశాయి. ప్రథమార్థం చాలా ఆకట్టుకునే లా సాగినా ద్వితీయార్థం మందగించింది.
నటీనటులు: అభిషేక్ బచ్చన్, రాజ్ కుమార్ రావు, ఆదిత్య రాయ్ కపూర్, ఫాతిమా, సన్య మల్హోత్రా
సంగీతం: ప్రీతమ్
నిర్మాణం: టీ సీరీస్ – అనురాగ్ బసు
దర్శకత్వం: అనురాగ్ బసు
విడుదల: నెట్ ఫ్లిక్స్ (12-11-2020)
ఒక్క మాటలో: మంచి బర్ఫీ లాంటి సినిమా
రేటింగ్: 3/5
– హేమసుందర్ పామర్తి