తమిళ్ స్టార్ హీరో సూర్య నటించిన తాజా చిత్రం`ఆకాశం నీ హద్దురా‘. ఇటీవలే అమెజాన్ ప్రైమ్ ద్వారా రిలీజ్ అయిన ఈ సినిమా భారీ విజయాన్ని అందుకుంది. డెక్కన్ ఎయిర్ లైన్స్ వ్యవస్థాపకుడు గోపీనాథ్ జీవితం ఆధారంగా తెరకెక్కించిన ఈ సినిమాకు మంచి స్పందన లభించింది. చాలాకాలం తర్వాత తమ అభిమాన హీరోకు సాలిడ్ హిట్ వచ్చిందని సూర్య అభిమానులు పండగ చేసుకుంటున్నారు. ఈ విజయం తెచ్చిపెట్టిన జోష్ తో సూర్య వరుస సినిమాలను ఓకే చేస్తున్నాడు.
ఈ నేపథ్యంలో సూర్య తమిళంలో ఒక మల్టీస్టారర్ చేయడానికి సిద్ధం అవుతున్నారని కోలీవుడ్ లో గుసగుసలు వినపడుతున్నాయి. కోలీవుడ్ విలక్షణ దర్శకుడు బాలా దర్శకత్వంలో ఈ మల్టీస్టారర్ ఉంటుందని సమాచారం. ఇందులో సూర్యతో పాటుగా ఆర్య కూడా స్క్రీన్ షేర్ చేసుకుంటున్నాడని తెలుస్తోంది. గతంలో బాలా దర్శకత్వంలో సూర్య, మరో స్టార్ హీరో విక్రమ్ తో కలిసి’ శివపుత్రుడు’ సినిమాలో నటించిన విషయం తెలిసిందే. అలాగే.. ఆర్య సైతం ‘అవన్ ఇవన్, నాన్ కడవుళ్’ లాంటి బాల సినిమాల్లో నటించి మెప్పించాడు. ఆ సినిమాలన్నీ తమిళ్ లోనే కాకుండా తెలుగులోనూ హిట్ అయ్యాయి. మళ్ళీ ఇంత కాలానికి సూర్య బాలా దర్శకత్వంలో నటించనుండడం విశేషం. ప్రస్తుతం కథకు సంబంధించిన చర్చలు జరుగుతున్నాయని, త్వరలోనే ఈ సినిమా సెట్స్ పైకి వెళ్లనున్నదని కోలీవుడ్ లో టాక్ నడుస్తోంది.
ఒక వైవిధ్యమైన కథాంశంతో దర్శకుడు బాలా ఈ సినిమాను తెరకెక్కించబోతున్నారని, ఇందులోని సూర్య, ఆర్య పాత్రలు చాలా కొత్తగా ఉంటాయని సమాచారం. కొన్ని రోజుల్లో దర్శకుడు బాలా ఈ సినిమాకు సంబంధించిన పూర్తి వివరాలను మీడియా ముఖంగా తెలియజేస్తారని సినీ వర్గాలు తెలిపాయి. అయితే ప్రస్తుతం సూర్య ‘నవరస’ అనే వెబ్ సిరీస్ లో కూడా నటిస్తున్నాడు. ఈ వెబ్ సిరీస్ కు గౌతమ్ మీనన్ దర్శకత్వం వహిస్తున్నాడు. త్వరలోనే ఈ వెబ్ సిరీస్ షూటింగ్ పూర్తవుతుందని ఆ వెంటనే సూర్య బాలా తీస్తున్న సినిమా షూటింగ్ లో జాయిన్ అవుతారని సమాచారం. ఈ సినిమాపై పూర్తి విషయాలు తెలియాలంటే ఇంకొన్ని రోజులు ఆగాల్సిందే .
Must Read ;- తమిళ స్టార్ హీరో సినిమా విడుదల వాయిదా పడింది.. కారణమేంటి?
